Pak orë para protestës së paralajmëruar sot në orën 17:00 përpara Parlamentit, kreu i PD-së, Sali Berisha, në një deklaratë për mediat bëri thirrje për një pjesëmarrje masive.
Berisha tha se përfaqësuesit e 750 mijë qytetarëve në Kuvend sot po trajtohen me praktika staliniste.
“Të bashkohemi sot në 5 në një protestë të fuqishme para Parlamentit shqiptar. Kjo protestë që shënon vazhdimin e revolucionit demokratik, ka për qëllim madhor ngritjen e zërit, revoltën kundër dhunimit, kundër shkelmimit të interesave të 750 mijë zgjedhësve shqiptarë, të cilët në datën 25 prill votuan për partitë opozitare.
Përfaqësuesit e 750 mijë qytetarëve trajtohen në Parlamentin shqiptar me praktika staliniste, kriminale të turpshme. Përfaqësuesit e këtyre 750 mijë qytetarëve shqiptarë që kanë detyrë themelore mbrojtjen e interesave të tyre, kanë detyrë themelore kontrollin e qeverisë dhe transparencës nga abuzimet, përjashtohen, bllokohen, iu mohohet e drejta e fjalës dhe nuk lejohen të ngrejnë komisione hetimore parlamentare”– tha Berisha.
Berisha tha se zëri i popullit opozitar duhet të dëgjohet në sallë dhe jashtë saj.
“Ata që u strukën në vrima miu në datën 11 shkurt, ata që postuan video të regjistruara kohë më parë, tani dalin nga vrima e miut e tallen me qytetarët, tallen me protetën e tyre të jashtëzakonshme.
Ky është morali i tyre, karakteri i tyre ndaj dhe sot në orën 5, ju ftoj të gjithëve para Parlamentit të dëgjohet zëri juaj, të dëgjohet në sallë dhe jashtë saj, zëri i popullit opozitar.”– tha Berisha.
