Ish kryeministri Sali Berisha ka deklaruar nga foltorja e Kuvendit se Edi Rama duhet të japë dorëheqjen dhe të hetohet nga SHBA-ja, pasi sipas tij, kryeministri shqiptar është i përfshirë në një aferë korruptive, referuar arrestimit të agjentit të FBI-së, McGonigal.
Teksa fliste në foltoren e Kuvendit, Berisha rrethohet nga deputetët e PD, mbështetës të tij ndërkohë që garda u afrua pranë tyre për të shmangur ndonjë incident.
“Shqipëria gjendet në epiqendrën e një cikloni. Që do të poshtëronte çdo vend të madh. Kryeministri i Shqipërisë dhe ministrat e tij, këshilltarët e tij janë të implikuar direkt në një aferë korruptive në korruptimin e njëri prej njerëzve me njohuri më të jashtëzakonshme, më sensitive në SHBA për sigurinë e këtij vendi dhe vendeve të lira”, tha Berisha.
“Edi Rama të vijë këtu të shpallë dorëhejqen dhe të hetohet nga Shtetet e Bashkuara të Amerikës”, tha Berisha në foltoren e Kuvendit ndërsa kryeparlamentarja Nikolla i ndërpret fjalën.
Momentalisht kryeministri Edi Rama nuk shihet në sallë i cili së fundmi është i përfshirë në skandalin me ish agjentin e FBI McGonigal. Opozita ka kërkuar që të ndryshohet rendi i ditës sot në Kuvend, për të diskutuar për çështjen e skandalit të Edi Ramës në SHBA. Në kërkesën e deputetëve opozitarë thuhet se duhet të ndryshohet rendi i ditës për të përfshirë një mocion për debat me Ramën.
Kryetarja e Kuvendit, Lindita Nikolla hodhi në votim kërkesën e opozitës për ndryshimin e rendit të ditës për të diskutuar për çështjen e skandalit të Edi Ramës në SHBA.
Kërkesa e opozitës u refuzua nga votat e mazhorancës, ndërsa deputetët e opozitës janë çuar në këmbë për të kundërshtuar vendimin. Menjëherë pas kësaj kanë shpërthyer debatet dhe përplasjet pasi Berisha bllokoi foltoren e Kuvendit ndërsa dëgjohet teksa thotë se: “Ku e keni fshehur Edi Ramën, ai është kryeministri më i korruptuar i Europës”
