Seanca e sotme parlamentare pritet të prodhojë debate të forta mes opozitës dhe mazhorancës për shkak të arrestimeve të bujshme që kanë ndodhur në SHBA ku dyshohet se kryeministri shqiptar Edi Rama është implikuar në afera korruptive me mikun e tij dhe njëkohësisht zyrtarin e lartë të FBI-së, Charles McGonigal, tashmë në pranga.
Rend dite në kuvend do të jenë diskutimet për viktimat e Holokausit në kuadër të Ditës Ndërkombëtare të Përkujtimit të Holokausit, ku si fillim do të mbajë fjalën kryetarja e Kuvendit Lindita Nikolla, kryeministri Edi Rama dhe kryetarët e grupeve parlamentare respektive.
Opozita ka kërkuar që të ndryshohet rendi i ditës sot në Kuvend, për të diskutuar për çështjen e skandalit të Edi Ramës në SHBA. Në kërkesën e deputetëve opozitarë thuhet se duhet të ndryshohet rendi i ditës për të përfshirë një mocion për debat me Ramën.
Në kërkesën e opozitës thuhet se kryeministri shqiptar është përfshirë në këtë skandal, pasi në padinë e dorëzuar në gjykatën amerikane theksohet se Rama ka realizuar të paktën 5 takime të fshehta me ish-zyrtarin e lartë të FBI, Charles McGonigal. Ky i fundit është arrestuar pasi ka marrë një ryshfet prej 225 mijë dollarësh nga njerëzit e Ramës për të ndikuar në zhvillimet e brendshme politike në Shqipëri.
Opozita thekson po ashtu se Charles McGonigal është nën akuzë se ka bashkëpunuar me oligarkun rus, Oleg Deripaska, që njihet si krahu i djathtë i Vladimir Putinit.
