Një familjeje në Tiranë i janë vjedhur një shumë prej 120 mijë euro nga pastruesja e shtëpisë dhe i biri. Këtë zbuluan hetimet e prokurorisë dhe policisë së Tiranës, që njoftoi këtë të Shtunë arrestimin e pastrueses dhe djalit të saj.
Në pranga u vunë Rozeta Dobi, 49 vjeçe dhe Havier Dobi, 23 vjeç, të dy banues në Tiranë.
Autoritetet kanë arritur të sekuestrojnë mbi 8 milionë lekë të rinj të dyshuar të vjedhur në banesën pranë “Liqenit Artificial”, sende me vlerë, 3 automjete. 2 prej tyre, sipas hetimeve, janë blera me paratë e vjedhura, si dhe veshje të përdorura gjatë kryerjes së këtij krimi
Hetimet
Policia njofton zyrtarisht se hetimet janë zhvilluar me metoda speciale proaktive dhe për një periudhë tre javore janë arritur të sigurohen provat që fajësojnë personat e arrestuar.
“Nga provat e siguruara në kuadër të këtij operacioni, rezultoi se gjatë periudhës që Rozeta Dobi ka qenë e punësuar për mirëmbajtjen e një banese në rrugën e Kosovarëve, ajo, në bashkëpunim me djalin e saj, ka vjedhur në këtë banesë, shuma të konsiderueshme parash dhe sende me vlerë, të cilat arrijnë në vlerë totale, rreth 120 mijë euro”, njofton policia.
“Gjatë kontrollit të banesës së shtetasve të arrestuar, shërbimet e Policisë gjetën dhe sekuestruan në cilësinë e provës materiale, 58 150 euro, 7000 dollarë, 368 000 lekë të rinj, sende me vlerë (aksesorë floriri), 3 automjete, 2 prej tyre të blera nga paratë e vjedhura, si dhe veshje të përdorura gjatë kryerjes së kësaj veprimtarie”, thuhet më tej në njoftim.
