Kryetari i PD, Sali Berisha, gjatë takimit me pedagogët e universiteteve tha se ata dhe asistentët e tyre, janë ndër më të keqpaguarit në vend.
Berisha tha se gjatë qeverisjes së maxhorancës socialiste u dëmtua liria akademike, pasi kryeministri Rama arriti deri aty sa të caktonte rektorin e Universitetit të Tiranës përmes bandave më të rrezikshme.
Gjithashtu, Berisha tha se Shqipëria ka buxhet 10 herë më të ulët se mesatarja e vendeve të BE-së, për kërkimin shkencor.
Berisha:“Pedagogët e universiteteve, asistentët e tyre mbetën ndër më të keqpaguarit. Rrogat qesharake për pedagogun, intelektualin. 3 ditë më parë kisha një takim me mjekët, çfarë tregoi njëri prej tyre. Unë tha operoj të sëmurën me patologji të mitrës, operacion që mund të jetë dhe madhor. Paguhej 25 mijë lekë të vjetra. Kompleti që ishte sterilizuar për operacionin, kompania merrte 820 mijë lekë. Nëse mua nuk më mjaftonte ky kompleks, e do të hapja një tjetër, shkonte në 1.2 milionë. Kjo tregon se çfarë mund të bëjë babëzia në këtë vend. Dhe kjo është kudo. Po kush e ka sterilizimin thoni ju, e ka Edi Rama. A keni parë të gjithë ju kur kalonte nga ekrani në ekran me një pincë të thyer, që nuk ekziston askund, përveç se në koshin me plehra, por për të justifikuar koncesionin e tij të sterilizimit dhe mashtronte shqiptarët, ja me çfarë operonin. Kush mund të bëjë një gjë të tillë tjetër. I jam shumë mirënjohës mjekut që e tha haptas, kurse ju skeni fare, as fond për kërkime shkencore. Për të bërë një kërkim duhet të firmoset nga ministri. Këta punojnë për të krijuar kushte që ju të largoheni nga Shqipëria, mjekët të largohen nga Shqipëria“, u shpreh kryedemokrati.
