Grupi “Homeland Justice” ka publikuar mbrëmjen e djeshme (E Diel) në “Telegram” një folder me listën e zgjedhësve. Bëhet fjalë për një databazë prej rreth 741.8 MB. Ajo përmban mijëra emra qytetarësh.
Në folder janë të dhënat gjenerale si emri, mbiemri, datëlindja e qytetarëve, numri i qendrës së votimit si edhe bashkia që ata i përkasin.Në disa prej tyre shkruhet se janë pjesë e votuesve në vitin 2015. Në shumë të tjerë nuk përcaktohet.
Krahas folderit, grupi i hakerave iranianë ironizon kryeministrin Rama për deklaratën e tij se “të dhënat e tyre janë të fotomontuara”.
“A besojnë ende politikanët tanë të korruptuar se ne nuk kemi akses në të dhënat thelbësore?!” – shkruajnë iranianët krahas folderit.
Hakerat iranianë kanë nxjerrë të dhënat e kryeministrit Edi Rama, kreut të SHISH, Helidon Bendo dhe bashkëshortes së tij, ish-drejtorit të policisë Gledis Nano, të nëndrejtorit të SHISH, Oljan Kanushit, dhe drejtorit të Përgjithshëm të Policisë së Shtetit, Muhamet Rrumbullakut.
Në skedën e shpërndarë në aplikacionin e komunikimit “Telegram”, janë të dhënat personale të tyre, informacion mbi përbërjen familjare, të dhënat e letërnjoftimeve dhe pasaportave. Numrat e celularit, vendbanimi dhe një listë me hyrje-daljet nga territori i vendit, pikat e kalimit, datat kur është kaluar kufiri dhe dokumentet që ka paraqitur te autoritetet doganore.
Më pas hakerat iranianë publikuan edhe listat e punonjësve të SHISH si dhe të punonjësve të policisë.
