Kreu i Partisë Demokratike, Sali Berisha ka përshëndetur vizitën në vendin tonë të Presidentit të Gjermanisë, Frank Walter Steinmeier.
Gjatë një deklarate për mediat, Berisha nuk la pa përmendur mirësinë dhe zemërgjerësinë e Steinmeier i cili u tregua i gatshëm për të ndihmuar Bujar Nishanin që të kurohej jashtë vendit.
“Një përshëndetje të përzemërt presidentit Steinmeier për këtë vizitë në vendin tonë. Presidenti vjen këtu si mik dhe kryetar i një shteti që ka ndihmuar Shqipërinë nga viti 90 deri me sot me mbi 1 miliardë e 300 milionë euro. Një vend që ka mbështetur Shqipërinë në të gjithë përpjekjet e saj për të vendosur demokracinë dhe ekonominë e tregut. Si ministër i Jashtëm, ai ka mbështetur çlirimin e Kosovës së bashku me qeverinë e vendit të tij. Interesi i tij për Shqipërinë dhe shqiptarët ka qenë gjithmonë prezent. Kam mirënjohje për kujdesin e tij njerëzor tejet të çmuar që tregoi për presidentin Bujar Nishani në momentet më kritike të jetës së tij. Me këtë rast, i shpreh mirënjohjen më të thellë për aktin dhe gjestin e tij shumë njerëzor në mbështetje të përpjekjeve të presidentit Nishani në sëmundjen e tij”, tha fillimisht Berisha.
Gjatë fjalës së tij Berisha denoncoi atë të cilën ai e quajti si “dhunë barbare të Edi Ramës ndaj mediave në pronësi të biznesmenit Irfan Hysenbelliu”. Berisha theksoi se kjo është një hakmarrje e pastër e Edi Ramës pasi mediat kanë zbuluar aferat e qeverisë së tij.
“Unë gjithashtu dua të denoncoj me forcën më të madh, aktin kriminal, hakmarrjen primitive, të turpshme, antiligjore, antikushtetuese të Edi Ramës ndaj pronave të biznesmenit Irfan Hysenbelliu, që është njëkohësisht pronar mediesh. Ju garantoj që kjo që shihni aty, nuk ka asnjë lidhje tjetër,përveç hakmarrjen e egër dhe primitive të Edi Ramës, për qëndrimin që këto media kanë mbajtur në informacionin për qytetarët shqiptarë. Unë kam këtu shkresën ku IKMT në vitin 2017, merr përgjigje se resorti po ndërtohet mbi bazën e një vendimi të Këshillit të Ministrave. Pra, ka leje dhe çdo gjë.
Ky akt i shëmtuar i një njeriu të sfazuar nga fakultetet mendore, i një njeriu që përfaqëson errësirën, arkaizmin më të thellë njerëzor në hakmarrje, është kjo që ndodh sot, në një ditë si kjo, që është një ditë e veçantë, se një burrështetas i një vendi të madh viziton vendin, ndërkohë që fadromat e një njeriu të verbër i futen një resorti ku PS ka zhvilluar dhjetëra e dhjetëra aktivitete elektorale. Një gjë ju siguroj, se do jenë taksapaguesit shqiptarë që do paguajnë urrejtjen e këtij karakteropati si në rastin e Agonit dhe në raste të tjera. Këtë herë do i paguajnë një për një, ne do bëjmë ligjin që çdo arbitrazh të dëmshpërblehet nga Edi Rama dhe Belinda Balluku. Kjo vjen pas televizionit Ora, që ky i çoi Arapin e zi për xhandar. Ky është një njeri i çmendur nga fobia mediatike. Ky jeton i tmerruar për shkak të vjedhjeve që ka bërë. Ka firmosur jo si kryeministër, por si kryetar i një organizate kriminale. Por opozita shqiptare do bëjë gjithçka dhe do e hedhë atë ku e meriton”, vijoi Berisha.
Në një dalje për mediat, ku reagoi për ndërhyjet e IKMT ndaj Prestige Resort, Berisha tha se PD kur të vijë në pushtet do të miratojë ligjin, që gjyqet ndërkombëtare të paguhen nga Rama dhe ministrja Balluku.
“Në këtë resort PS ka zhvilluar dhjetëra ceremoni, këta meritojnë çdo fjalë, por njeriu nuk duhet që të prishë gojën e tij. Taksapaguesit shqiptar do të paguajnë gabimet e Edi Ramës, ndonëse ne do të bëjmë ligjin që pagesa të bëhet personalisht nga Edi Rama dhe Belinda Balluku. është një njeri i çmendur nga fobia mediatike, jeton i tmerruar për vjedhjet që ka bërë. Ka firmosur si kreu i një organizate kriminale”, përfundoi Berisha.
