Kryetari i PL, Ilir Meta sapo ka mbërritur në selinë e Partisë Demokratike.
Ky takim “kokë më kokë” me Sali Berishën vjen vetëm 1 javë para protestës së paralajmëruar nga kreu i Partisë Demokratike në ditën e Samitit të BE-së me Ballkanin Perëndimor.
Ende nuk dihen detaje nga takimi mes dy liderëve të opozitës por tema kryesore e diskutimeve mbetet protesta e 6 dhjetorit dhe skenari i opozitës në ditën kur në Tiranë do të zbarkojnë liderët e gjithë Europës. Kujtojmë se një ditë më parë, Ilir Meta konfirmoi pjesëmarrjen e tij në këtë protestë, krah Sali Berishës.
“Nëntori për ne shqiptarët është muaji i pavarësisë, i çlirimit dhe lirisë. Dhe ju e dini që dhjetori po kështu për gjithë shqiptarët e ndershëm patriotë dhe liridashës është muaji i demokracisë dhe i Europës, kështu që pa asnjë diskutim që më 6 dhjetor ne do të jemi të gjithë për të brohoritur se do ta bëjmë Shqipërinë si gjithë Europa, një vend të lirë, ku t’i jepet fund kapjes së shtetit dhe instalimit të mafies në pushtet”, deklaroi Meta një ditë më parë kur u pyet nëse do të jetë i pranishëm në këtë protestë.
