Kryedemokrati, Sali Berisha ka dhënë detaje ditën sotme në lidhje me protestën e lajmëruar nga opozita ditën e hënë para kryeministrisë.
Berisha u shpreh se kjo protestë do të shënojë sipas tij hapjen e një “foltoreje parlamentare qytetare” e cila ka për qëllim të kundërshtojë bllokimin e plotë të zërit të opozitës në Kuvend.
Ai theksoi se deputetët dhe qytetarët do të kenë mundësi të flasin dhe të debatojnë publikisht çdo javë, ndërsa paralajmëroi se protesta të tjera janë në plan dhe do të organizohen në momentin më të përshtatshëm.
“Protesta e ditës së hënë ka këtë karakter, që të sqaroj çdo qytetar. Ne hapim aty një foltore, një parlament. Dmth, ju keni parë se në 10 seanca, opozita është lejuar të debatojë vetëm në 1 seancë, si kurrë në ndonjë vend pluralist, apo në historinë e këtij vendi. Atëherë ne para këtij bllokimi të plotë ne hapim foltoren parlamentare qytetare para kryeministrisë. Një herë në javë ku deputetë dhe qytetarë do thonë zërin e tyre. Pra, ky është qëllimi i kësaj proteste. Protesta të tjera po projektohen dhe do organizohen, por ato do përgatiten dhe thirren në kohën më të përshtatshme”,- është shprehur Berisha.
