Ka përfunduar pas dy orësh mbledhja e përbashkët mes dy qeverive Kosovë-Shqipëri.
Seanca u hap nga nga kryetarja e Kuvendit Lindita Nikolla e cila u shpreh se kjo ditë është e paharrueshme për shqiptarët, ndërsa homologu i saj Glauk Konjufca përmendi qëllimet destabilizuese të Serbisë ndaj Kosovës.
Kryetari i parlamentit të Kosovës theksoi se dy shtetet duhet të bëhen më shumë se kurrë bashkë për të penguar çdo përpjekje për ‘tensione’. Pas kryetarëve të dy kuvendeve, mbajtën fjalën e tyre ministrat e brendshëm të dy shteteve, kryetarët e partive kryesore dhe së fundmi kryeministrat shqiptarë Albin Kurti dhe Edi Rama.
Kreu i qeverisë së Kosovës Albin Kurti u shpreh i emocionuar për këtë takim historik, ndërsa theksoi se ligjvënësit e dy shteteve nuk duhet të bëhen bashkë vetëm në ditë festash. Kurti nuk la pa përmendur largimin masiv të të rinjve jashtë vendit, duke iu garantuar atyre se shumë shpejt do të vijë dita që edhe bota të bindet se shqiptarët mund të bëjnë shtet.
Rama e nisi fjalën e tij duke kujtuar firmëtarët e pavarësisë së Shqipërisë dhe nënvizoi se marrëdhëniet me Kosovën janë mëse produktive.
Vlen të përmendet se kryedemokrati Sali Berisha dhe deputetët e tij dolën jashtë salle në momentin që kryeministri i vendit po mbante fjalën.
Berisha deklaroi jashtë Kuvendit se ai i ka ngulur thikën pas shpine Kosovës, ndërsa u zotua se protesta e 6 dhjetorit nuk do të ndalet dhe bulevardi do të mbushet plot.
