Vijon të rëndohet bilanci i viktimave nga dy tërmetet e fuqishme që goditën Venezuelën mbrëmjen e së mërkurës. Sipas presidentes në detyrë të vendit, numri i të vdekurve ka shkuar në 589, një rritje e ndjeshme krahasuar me 235 viktimat e konfirmuara vetëm pak orë më parë.
Autoritetet bëjnë të ditur se 2.980 persona kanë mbetur të plagosur, ndërsa më shumë se 50 mijë rezultojnë ende të zhdukur, sipas platformës ku familjarët raportojnë humbjen e kontakteve me të afërmit e tyre.
Ndërkohë, ekipet e kërkim-shpëtimit nga e gjithë bota kanë nisur të mbërrijnë në Venezuelë për të ndihmuar në operacionet e shpëtimit. Sipas OKB-së, të paktën 17 shtete kanë dërguar ose po dërgojnë ekipe specializuese për kërkimin e të mbijetuarve.
Në terren ndodhen tashmë ekipe nga Kili, Kolumbia, El Salvadori, Italia, Meksika, Zvicra dhe Shtetet e Bashkuara, ndërsa pritet mbërritja e forcave nga Britania e Madhe, Franca, Gjermania, Spanja, Holanda, Katari, Jordania, Çekia dhe Ekuadori.
Operacionet e kërkimit zhvillohen në kushte tepër të vështira. Një zjarrfikës i angazhuar në terren deklaroi se mungojnë personeli dhe pajisjet për të nxjerrë viktimat nga rrënojat.
“Nuk kemi mjaftueshëm njerëz dhe mjete. Është një garë me kohën”, tha ai, duke shtuar se është shumë më e vështirë të gjenden të mbijetuar sesa trupat e viktimave.
Ekspertët theksojnë se ekipet e shpëtimit kanë vetëm një “dritare të artë” prej rreth 72 orësh pas tërmetit për të gjetur njerëz të gjallë nën rrënoja, përpara se dehidratimi, plagët e rënda dhe shembjet e mëtejshme të ulin ndjeshëm shanset për mbijetesë.
Paralajmërimi i sizmologëve
Ekspertët paralajmërojnë se vendi duhet të përgatitet për një seri të gjatë pasgoditjesh. Sizmologu Stephen Hicks nga University College London deklaroi se është e pazakontë që dy tërmete me magnitudë të ngjashme të ndodhin kaq pranë njëri-tjetrit në kohë dhe hapësirë.
Sipas tij, Venezuela pritet të përjetojë qindra pasgoditje gjatë javëve dhe muajve në vijim, megjithëse shumica nuk do të kenë fuqinë shkatërruese të dy tërmeteve kryesore.
