Qendra e Tiranës vazhdon të jetë destinacioni kryesor për turistët e huaj që vizitojnë Shqipërinë.
Me arkitekturën moderne dhe sheshet e rregulluara, kryeqyteti përpiqet të shfaqet si një metropol i pastër dhe i organizuar.
Por, vetëm pak metra larg nga bulevardet kryesore, panorama ndryshon krejtësisht.
Vizitorët që kalojnë përtej unazës së vogël shohin kazanë të mbushur me mbetje urbane, rrugë e trotuare të mbuluara nga plehrat dhe një menaxhim të dobët të pastrimit.
Një turist italian shprehet: “Ajo që shohim këtu është shumë ndryshe nga qendra”. Ndërsa një vizitor nga Norvegjia thotë: “Pamja nuk është e mirë për t’u parë. Shpresoj që t’i pastrojnë sot”.
Për banorët, kjo situatë është e përditshme dhe shqetësuese. Ata ankohen për kazanët e mbushur, insektet dhe erën e rëndë që përhapet në lagje.
“Temperatura bën të vetën, insektet, mizat. Kjo është skandaloze”, shprehet një banor. Të tjerë thonë se apeli i tyre drejtuar bashkisë bie në vesh të shurdhër.
Bashkia e Tiranës ia ka dhënë tenderin e pastrimit kompanisë Eco Tirana, me një kontratë miliona euro që përmban detyra strikte për mbajtjen e qytetit të pastër.
Por, sipas qytetarëve, detyrimet mbeten vetëm në letër, ndërsa realiteti është një nga periudhat më të vështira të menaxhimit të mbetjeve urbane./ tv klan
