Kreu i PD-së, Sali Berisha deklaron se protesta e lajmëruar nga Partia Demokratike më 6 dhjetor do të mbahet në ambientet përpara kryeministrisë, pavarësisht se policia nuk e ka miratuar një leje të tillë.
Në një prononcim për media pasi braktisi mbledhjen Kuvendeve të Shqipërisë dhe Kosovës kur Rama mori fjalën, Berisha tha se më 6 dhjetor, do të mbahet protesta më e madhe që kanë njohur ndonjëherë shqiptarët.
Berisha shton se Rama është njeriu që po shkatërron më shumë se kushdo tjetër materien, identitetin kombëtar të shqiptarëve dhe me politikat e tij ai ka dëbuar 27% të popullsisë shqiptare drejt rrugëve të botës.
“6 dhjetori do të jetë protesta më madhështore që kanë parë shqiptarët. Dhe ata do të ngrihen në emër të idealeve evropiane për të drejtat e tyre.
Ajo protestë do të mbahet përpara kryeministrisë. I them bashkisë të mos përzihet se nuk ka forcë në botë që e ndalon. Unë e di që Edi Rama kërkon të ketë dhunë.
Bën mirë që atë ditë dhe ato dyert e kryeministrisë të mos i blindojë se do bëhet lajm botëror.
Ne jemi në protestë ndaj Edi ramës dhe pro Bashkimit Evropian.
Kur pyes veten se a më dëmtuan a më ndihmuan me “non-gratën”, them se më ndihmuan. Sepse më hapën një mundësi për të mbrojtur interesat e vendit tim.
Rama është njeriu që po shkatërron më shumë se kushdo tjetër materien, identitetin kombëtar të shqiptarëve. Me politikat e tij ai ka dëbuar 27% të popullsisë. Në këtë kontekst ai meriton urdhërin e artë të Vaso Çubrilloviç, pasi ka zbatuar të gjithë platformën e tij me përpikmëri për largimin dhe dëbimin e shqiptarëve nga trojet e tyre.
Edi Rama është hajduti më i madh i të gjitha kohërave. Mjafton të përmendim aferën e portit të Durrësit që kalon dhe çdo shfrytëzim që mund të bëhej dhe nga një kolonizator”- tha Berisha.
