Kryetari i Partisë Demokratike, Sali Berisha paralajmëroi nga podiumi i protestës para kryeministrisë se Rama do të shkojë në burg.
Gjatë fjalës së tij, Berisha akuzoi kreun e qeverisë Edi Rama se po vjedh shqiptarët.
“Njëlloj si 32 vite më parë, le të ndalemi një moment dhe të shohim pse u bëmë sërish njerëzit e gomoneve”, u shpreh ai.
“Shqiptarët sot janë popull i gomoneve. Edi Rama është armiku më i egër i lirive tona. Ai që të merr shpresën të ka marrë besimin. Ai që të merr votën, të ka marrë dinjitetin. Njeriu që nuk voton i lirë është i pashpresë”, shtoi.
Duke iu drejtuar Ramës, Berisha theksoi: “E ke vendin në burg, në regjim special dhe atje do të të çojmë”.
“Mediat e Britanisë, e Evropës kanë shkruar se shqiptarët ikin nga varfëria, shqiptarët janë sot njerëzit të vjedhur të planetit. S’ka si në Shqipëri njerëz të vjedhur nga qeveritarë që s’kanë më asnjë normë morale, asnjë ligj, asnjë Kushtetutë, por kanë kodin e vjedhjes, mafies, krimit, të dëbimit të shqiptarëve nga Shqipëria”, tha.
Më tej, paralajmëroi largimin e Ramës nga pushteti. Duke iu referuar gjuhës fyese të Ramës ndaj opozitës, Berisha deklaroi: “Atje për së shpejti di vijë gjykatësi sovarn, këta burra dhe gra. Më mirë priti këta se ne do të përgjigjemi si të duash ti, por dhe populli i ka dy tre fjalë me ty”.
Apeli për ndërkombëtarët
Një apel e bëri edhe për ndërkombëtarët.
“Mos mbështesni regjimin e Edi Ramës se Rama është armiku i votës së lirë të shqiptarëve. Çdo mbështetje për të është ndëshkim për shqiptarët. Sikundër nga ky shesh duhet tu deklaroj se Shqipëria s’do të ketë kurrë stabilitet pa votën e lirë të qytetarëve shqiptarë, stabiliteti dhe vota, stabiliteti dhe shpresa, stabiliteti dhe besimi, stabiliteti dhe e ardhmja do jetë të pandara”, tha kreu i PD.
Apeli për qytetarët
Berisha u bëri thirrje qytetarëve ti bashkohen protestave.
“Ky miting është sirenë e fuqishme e shpresës për çdo shqiptar të bashkoheni me ne, në mënyrë që Ramës t’ja shkurtojmë ditët, ti presim biletën për aty ku e ka vendin. Slogani juaj ‘Edi Rama o hajdut, boll vodhe, shko në burg” do bëhet realitet”, u shpreh kreu i PD-së.
“Ne jemi të betuar të bëjmë çdo sakrificë për të sjellë votën e lirë në Shqipëri. Mjerë ai që rek lirinë e shqiptarëve, mjerë ai që prek votën e tyre, votën kurrë nuk ta fali. Çdo qytetar që do shpresën të bashkohet me ne kundër vrasësit të shpresës së shqiptarëve, Edi Ramës. Rama i trajton shqiptarët si një kolonizator, ndaj dhe ne duhet ta arkivojmë sa më parë”, shtoi.
“Shqipëria ka 1001 arsye për të qenë vend shprese, për të qenë vend besimi. Edi Rama i trajton shqiptarët si një kolonizator mizor dhe i egër, ndaj dhe ne duhet ta arkivojmë atë sa më parë. Çdo shqiptar që dëshiron dyfishimin e rrogave, pensioneve, ndihmës ekonomike, që do të shkollojë fëmijët në Shqipëri, të bashkohet me ne kundër Edi Ramës. I garantojmë se janë të gjithë potencialet për një paketë antikrizë që çmimet të mos jenë më të larta se në Kosovë e Maqedoni, që rrogat të dyfishohen, që nafta të mos jetë më e shtrenjtë. Ne garantojmë përgjysmimin e taksave për fermerët, garantojmë çmime energjie të paktën tre-katër herë më të ulët se sot. Garantojmë konkurrencë të ndershme dhe treg të lirë. Qytetarëve shqiptarë, që duan të ndërtojnë të ardhmen në këtë vend, i ftojmë të bashkohen me ne, se e ardhmja është mes nesh. Më mirë të përzëmë një njeri, sesa të përzihemi ne prej tij. Shqipëria sot ka nevojë më shumë se kurrë për besimin, për entuziazmin tonë. T’ia japim ne të gjitha këto dhe ajo do ia kthejë me mirësi çdo shqiptari. Dhe njëherë, Zoti u bekoftë ju, Zoti i bekoftë shqiptarët kudo që janë. Zoti e bekoftë votën tuaj, familjet tuaja. Rroftë Shqipëria”, e përfundoi fjalën e tij Berisha.
