Kryeministri Edi Rama është shprehur i kënaqur për nënshkrimin e 3 marrëveshjeve sot mes liderëve të Ballkanit Perëndimor në samitin e Procesit të Berlinit.
Na fjalën e tij gjatë konferencës për mediat, Rama tha se rajoni ka pritur me padurim nënshkrimin e marrëveshjeve, ndërsa tha se Shqipëria do të mikëpresë samitin e ardhshëm në Tiranë.
Rama nuk harroi të falenderojë ish-kancelaren gjermane Angela Merkel, si iniciatorja e Procesit të Berlinit, një nismë e ngjashme me Ballkanin e Hapur që tashmë duket se ka kaluar në “hije”.
“Më duhet të them se të gjithë nga rajoni ishin shumë të kënaqur që ishin në Berlin. 8 vjet pasi nisi procesi i Berlinit. Merkel pati të drejtë, nëse sot kemi një rajon të bashkuar në një moment të ndërlikuar të historisë, sekreti është procesi i Berlinit. Kur u mblodhëm këtu për herë të parë nuk ishim takuar asnjëherë në atë mënyrë. Falenderoj nga zemra kancelarin gjerman. Shqipëria do të mikëpresë samitin e ardhshëm”, tha Rama.
Në Samitin e Procesit të Berlinit 2022 u nënshkruan sot, tre marrëveshje rajonale mes vendeve të Ballkanit Perëndimor; Shqipërisë, Kosovës, Maqedonisë së Veriut; Malit të Zi, Bosnje dhe Hercegovina, si dhe Serbisë, përkatësisht:
1– Marrëveshja mbi lëvizjen e lirë me karta identiteti në Ballkanin Perëndimor
2– Marrëveshja mbi njohjen e diplomave të Arsimit të Lartë në Ballkanin Perëndimor
3– Marrëveshja për njohjen e kualifikimeve profesionale të mjekëve, dentistëve, arkitektëve në kontekstin e marrëveshjes për tregtinë e lirë në Europën Qendrore, – të cilat do t’i shërbejnë forcimit dhe thellimit të bashkëpunimit rajonal.
Procesi i Berlinit u krijua në 2014 si platformë për vendet e Ballkanit Perëndimor (Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia) për të përshpejtuar përafrimin më të ngushtë me BE-në dhe për të thelluar integrimin dhe bashkëpunimin rajonal, si faktor kyç për zhvillimin ekonomik dhe paqen në Ballkanin Perëndimor.
Procesi i Berlinit ka nisur në vitin 2014 me iniciativën e kancelares së atëhershme gjermane, Angela Merkel. Ndër qëllimet kryesore të këtij procesi janë: përmirësimi i bashkëpunimit rajonal dhe integrimi evropian i rajonit të Ballkanit Perëndimor.
Procesi fokusohet në lëvizjen e lirë të njerëzve, shërbimeve, mallrave dhe kapitalit. Fusha të tjera të veprimit në kuadër të tij janë: zgjidhja e çështjeve të brendshme dhe dypalëshe, si dhe pajtimi mes shoqërive të rajonit. Ky proces përfshin të gjashtë vendet e Ballkanit Perëndimor: Kosovën, Shqipërinë, Serbinë, Malin e Zi, Maqedoninë e Veriut dhe Bosnje e Hercegovinën
