Drejtoria e Përgjithshme e Tatimeve njofton zyrtarisht se ka nisur kontrollin për pagat në disa Universitete, në media dhe në Shoqëritë e Sigurimeve.
Sipas analizës së Tatimeve, këto sektorë përfshihen në fashën e dytë të riskut, pas ndërtimit dhe transportet.
Reagimi zyrtar i administratës tatimore vjen pas raportimeve se ata kanë nisur kontrollet pas protestës së pedagogëve.
Megjithëse Drejtoria e Tatimeve deklaron se kontrollet mbi universitetet janë parashikuar më herët, gjithësesi koha kur po zhvillohen krijon dyshimet publike se ato lidhen me protestën e pedagogëve, sidomos pas sulmeve publike të kryera nga kryeministri Edi Rama ndaj profesorëve grevistë.
Po ashtu, administrata tatimore njofton se do të ushtrojë kontroll mbi pagat në televizione, pasi, sipas saj, ekzistojnë dyshime për nënpagesa në funksione si operatorë, montazhierë, e të tjerë.
Sipas Tatimeve, “pasi përfundoi faza I, në fund të muajit qershor, me kontrollin e 18 subjekteve të vlerësuara me risk të lartë nga Drejtoria e Menaxhimit të Riskut, ka nisur faza II, e cila konsiston në kontrollin e 3 sektorëve më me risk, si: Sektori i Institucioneve të Arsimit Privat, Sektori i Mediave dhe Komunikimit dhe Sektori i Shoqërive të Sigurimeve”.
Drejtoria e Përgjithshme e Tatimeve thotë se “nga analiza e thelluar e menaxhimit të riskut, në secilin prej këtyre sektorëve, janë identifikuar subjekte me risk të evazionit, nëpërmjet mosdeklarimit real të pagave për të punësuarit në profesione të ndryshme”.
Pjesë e kontrollit tatimor në sektorin e Institucioneve të Arsimit Privat, kontrollet janë 7 subjekte, nga të cilat 4 shkolla të mesme të arsimit privat dhe 3 universitete.
Ndërsa në sektorin e Mediave edhe Komunikimit, kontrollet e Administratës Tatimore “janë përqëndruar në 5 subjektet e vlerësuara me risk të lartë :sa i takon fenomenit të nëndeklarimit të pagave, kur për pozicione si: Gazetar, kameraman, skenarist, montazhier, etj. paga është më e ulët se mesatarja e sektorit për këto profesione”, thuhet në njoftimin e tatimeve.
