Viti i ri akademik në Shqipëri ka nisur me bojkot.
Sot kemi hyrë në ditë e dytë të grevës së pedagogëve të cilët kanë paralajmëruar se nuk do të hyjnë në auditorë deri sa qeveria të plotësojë kërkesat e tyre dhe rritjen e pagave në nivelin e vendeve të tjera të rajonit.
Ndërkohë, thirrjes së sindikatës së pedagogëve i janë bashkuar dhe shumë studentë që mbështesin kauzën e pedagogëve. Këta të fundit kanë refuzuar propozimin e kryeministrit Edi Rama për rritjen e pagës në vlerën e 7%. Në fakultetin e “Histori dhe Filologji” procesi mësimor është bojkotuar në shmë salla, ndërsa në disa të tjera vijon procesi mësimor.
“Studentët janë mbështetja jonë, janë më të pafajshmit në këtë mes, më të pakapshmit, ata e dinë se ne nuk ua bëjmë dot leksionet as me slider sepse nuk ka infrastrukturë. të mos krijojmë më trauma sociale, e kemi traumatizuar këtë popull në ekstrem. Jemi akoma në kohë të Migjenit është e turpshme. Unë s’jam përfaqësuese e Sindikatës, por për intelektualin absurdi kurrë nuk mund të bëhet normale, ndoshta për njeriun e zakonshëm po, për ne jo. E keqja është të mos zgjate ky proces, të diskutojmë sepse bëhet fjalë për të ardhmen e këtij kombi”, tha një pedagoge e Filologji Histori.
E njëjta situatë ndodh dhe në Fakultetin e ‘Shkencave të Natyrës’. Sipas raportimeve të fundit në media bëhet me dije se auditorët e fakultetit janë boshë.
- Studentët në krah të pedagogëve:
Studentët kanë deklaruar se do të bashkohen në protestën e pedagogëve. Duke folur për mediat, studentët kanë deklaruar se ata nuk po shohin asnjë përmirësim në Shqipëri dhe ata do të mbështesin çdo protestë që sjell normalizimin e vendit.
“Kemi dalë posaçërisht për bojkotin, po presim dhe të tjerët që të na bashkohet. Ne mbështesim atë që të gjithë studentët duan. Nuk po shohim asnjë përmirësim. Ne duam që mos të ikin studentët që të mos e lënë Shqipërinë mbapa. Në rastin tonë ka ndodhur që persona në fjalë kanë bërë vitin e parë dhe më pas e kanë lënë. Ne duam që të kontriubojmë për vendin tonë” tha një studente që ka dalë në protestë.
Një prej pedagogëve të Shkencave të Natyrës deklaroi se rritja prej 15% është qesharake, pasi nuk përfshin të gjithë stafin akademik. Në një prononcim për mediat, pedagogu tha se një tjetër arsye se pse nuk pranohet kjo rritje është fakti se rritja kthehet në barrë për studentët.
“Çdo ditë, do të jemi në bojkot, deri sa të ulemi me qeverinë për të plotësuar kërkesat tona. Ka dy arsye që s’e pranojmë ktë rritje prej 15%. Nuk përfshihet i gjithë stafi. Rritja është barrë për studentët. Nuk e pranojmë këtë. Sot do të mblidhet Këshilli Studentor. Sot do të vijohet bojkot, në orën 10 takim dhe më pas do të vendosim”, tha pedagogu.
Ndërkohë, një tjetër pedagog i këtij fakulteti tha se në salla nuk ka asnjë koleg të tij që bën mësim.
“Di të them se në fakultetin e Shkencave nuk bëhet mësim. Mund të shihni të kontrolli sallat e leksioneve. Mund të ketë ndonjë rregullthyes, por secili është i lirë. Nëse nuk ju pëlqen greva dhe kërkesa për rritje page, atëherë janë të lirë. Është mbështetur nga 93% e stafit. Ne do ta ndalojmë bojkotin, nëse do të rriten. I ka mbledhur sot në takim rektorët”, pohoi ai.
- Reagimi nga Edi Rama:
Në një formë “karshillëku”, ashtu siç bëri rreth një javë më parë me anti-mitingun që realizoi në Universitetin Bujqësor, kreu i qeverisë Edi Rama ka thirrur sot në një takim rektorët e Universiteteve Publike dhe Jopublike.
Pavarësisht se Sindikata e Pedagogëve paralajmëron intensifikim të protestës, madje duke u zhvendosur edhe para Kryeministrisë, kreu i qeverisë Edi Rama duket se nuk ka ndërmend të dëgjojë kërkesat e tyre dhe as të negociojë një marrëveshje.
Nga një takim me rektorët e Universiteteve Publike dhe Jopublike, Rama i mbylli përfundimisht derën rritjes së pagës për pedagogët, duke thënë se ndryshimi me plus 15% që u bë një javë më parë është i fundit në historinë e Shqipërisë.
“Koha kur qeveria rrit pagat në mënyrë uniforme sepse kërkojnë sindikatat ka mbaruar bashkë me reformën e Arsimit të Lartë. Autonomia është liri dhe përgjegjësi. Kjo është hera e fundit që ne bëjmë rritje page uniforme. Do të mbështesim më shumë ata që ndihmojnë më shumë shoqërinë dhe iu shërbejnë më shumë studentëve. Dhe do të jetë rritje page e kombinuar midis mbështetjes nga shteti dhe të ardhurave që universiteti siguron jo nga tarifa e studentëve por nga futja si aktor në treg”, tha kryeministri.
Rama gjatë fjalës së tij nuk kurseu kritikat për universitetet shqiptare të cilat sipas tij kanë një rankim të dobët global.
“Renditja e universiteteve shqiptare në hartën globale, kjo edhe për shkak të kohës së gjatë të humbur para reformës, është thjesht e papranueshme”.”, tha Rama gjatë takimit paraditen e sotme me rektorët e universiteteve.
