Viti akademik në Shqipëri ka nisur me bojkot.
Pedagogët i kanë kërkuar qeverisë plotësimin e disa kërkesave, më kryesoren rritjen e pagave, e cila sipas tyre duhet të bëhet në të njëjtin nivel me vendet e tjera të rajonit. Por ditën e sotme, kryeministri Edi Rama ka menduar t’i “sfidojë” pedagogët duke zhvilluar një takim me rektorët e Universiteteve shqiptare të cilët morën kritika nga kreu i qeverisë për shkak të rankimit të dobët global.
Kryeministri Rama tha se universitete shqiptare nuk renditen aty ku duhet, dhe kjo për të është e papranueshme. Sipas tij, rankimi global lë për të dëshiruar, ndaj ftoi universitete publike dhje jopoblike të bëjnë më shumë në këtë aspekt.
“Renditja e universiteteve shqiptare në hartën globale, kjo edhe për shkak të kohës së gjatë të humbur para reformës, është thjesht e papranueshme. Por, lajmi i mirë sipas nesh, sipas analizës së bërë, është që “është një renditje që nuk pasqyron kapacitetet reale. Ky është lajm i mirë”, tha Rama.
Ai theksoi se duhen bërë hapa konkretë dhe pa humbur kohë duhen përmbushur kushtet, që në shumicën e herëve shtoi ai, janë gjëra elementare.
“Gjëja që kemi vendosur është që të merremi shumë seriozisht me këtë aspekt, që do të thotë që të ndjekim të gjitha kushtet, që duhen përmbushur, që nganjëherë janë kushte shumë elementare për të patur një rankim shumë serioz”, tha Rama.
Pedagogët iu përgjigjën thirrjes së drejtuesve të Sindikatës për të dalë sërish në shesh dhe për të protestuar duke kërkuar rritje të pagës e shtim të financimeve për kërkimet shkencore, ndërsa qeveria iu ka propozuar të pranojnë rritjen 7%.
