Viti i ri akademik 2022-2023 nisi ditën e djeshme me bojkot nga ana e pedagogëve, me auditorët në Tiranë, Shkodër, Elbasan e Gjirokastër që mbetën bosh pas prezantimit me studentët e vitit të parë.
Pedagogët iu përgjigjën thirrjes së drejtuesve të Sindikatës për të dalë sërish në shesh dhe për të protestuar duke kërkuar rritje të pagës e shtim të financimeve për kërkimet shkencore, ndërsa qeveria iu ka propozuar të pranojnë rritjen 7%.
Në një kohë që pedagogët protestonin në hyrje të Universitetit Politeknik të Tiranës, ministrja e Arsimit Evis Kushi hyri nga dera e pasme, në ruajtjen e mbi 20 oficerëve të Gardës për të inauguruar një laborator të ri, por nuk u prononcua për gazetarët për rrezikun që i kanoset vitit akademik.
Ndërkohë, protestat do të vijojë edhe sot si çdo ditë nëpërmjet bojkotimit të mësimdhënies dhe lënien bosh të auditorëve, por kryeministri Edi Rama duket i pashqetësuar.
Në një formë “karshillëku”, ashtu siç bëri rreth një javë më parë me antimitingun që realizoi në Universitetin Bujqësor, kreu i qeverisë ka thirrur sot në një takim rektorët e Universiteteve Publike dhe Jopublike.
Kreu i qeverisë është duke diskutuar mbi procesin e rankimit të institucioneve të arsimit të lartë dhe atë që ai e konsideron si ndërkombëtarizimi i universiteteve shqiptare, nëpërmjet përfshirjes në skemat e financimit të BE.
“Jemi këtu për të diskutuar për një tematikë që ka të bëjë me rankimin e universiteteve tona dhe një vlerësim të plotë të të gjithë kritereve të ligjshmërisë, kur jemi në një fazë që do ta quaj të ndërmjetme pas reformës së Arsimit të Lartë e fillimit të zbatimit të saj dhe në funksion të thellimit t kësaj reforme në organizimin e mëtejshëm të të gjithë sistemit tonë universitar. Dua të bëj me dije që sikundër e kishim diskutuar me rektorët, në takimin e Pragës të atij që u pagëzua si komuniteti i ri politik europian, unë kam ngritur temën e Universitetit si një temë që duhet konsideruar nga BE dhe për t’u adresuar pa pritur që Shqipëria dhe vendet e Ballkanit të bëhen anëtare të BE. Ne kemi si vende kandidate që negociojmë anëtarësimin tonë një akses të pjesshëm”, tha Rama.
