Pedagogët kanë hyrë në ditën e dytë të bojkotit të auditorëve, si formë proteste që ata kanë zgjedhur për të kërkuar nga qeveria rritjen e pagave dhe financimeve për kërkimet shkencore.
Pavarësisht se Sindikata e Pedagogëve paralajmëron intensifikim të protestës, madje duke u zhvendosur edhe para Kryeministrisë, kreu i qeverisë Edi Rama duket se nuk ka ndërmend të dëgjojë kërkesat e tyre dhe as të negociojë një marrëveshje.
Nga një takim me rektorët e Universiteteve Publike dhe Jopublike, Rama i mbylli përfundimisht derën rritjes së pagës për pedagogët, duke thënë se ndryshimi me plus 15% që u bë një javë më parë është i fundit në historinë e Shqipërisë.
“Koha kur qeveria rrit pagat në mënyrë uniforme sepse kërkojnë sindikatat ka mbaruar bashkë me reformën e Arsimit të Lartë. Autonomia është liri dhe përgjegjësi. Kjo është hera e fundit që ne bëjmë rritje page uniforme. Do të mbështesim më shumë ata që ndihmojnë më shumë shoqërinë dhe iu shërbejnë më shumë studentëve. Dhe do të jetë rritje page e kombinuar midis mbështetjes nga shteti dhe të ardhurave që universiteti siguron jo nga tarifa e studentëve por nga futja si aktor në treg”, tha kryeministri.
Kjo sipas Ramës është edhe esenca e Reformës në Arsim, e cila i jep autonomi universitetit dhe e bën të pavarur nga fondet e shtetit, duke e nxjerrë në treg të lirë sipas rregullit kërkesë-ofertë.
Për pedagogët që sot ndodhen në sheshe duke i qëndruar stoik kërkesave të tyre, Rama i kërkoi të kuptojnë se universitetet nuk janë as gjimnaze e as shkolla 9-vjeçare. Sipas shefit të qeverisë ato nuk mund të kërkojnë rritje page as si mjekët dhe policët.
“Patëm një diskutim me rektorët për çështjen e pagave. Duhet të jetë shumë e qartë se bota akademike, universitare është diçka ndryshe nga e gjithë pjesa tjetër. Universitet nuk janë gjimnaze, shkolla 9 vjeçare, trupa pedagogjike nuk janë trupa të mjekëve, infermierëve apo policisë. Që janë trupa që mbahen vetëm me pagën e shtetit dhe që përgjithësisht se tani me reformën e autonomisë spitalore do diferencohen edhe pagat e mjekëve sipas performancës por përgjithësisht janë uniforme. Universiteti është midis shtetit dhe tregut. Duhet ta ketë pjesë të ADN-së së vetë thithjen e të ardhurave nga tregu. Të jetë një aktor në treg dhe magnet për të thithur fonde nga të katër anët për kërkimin shkencor e të tjera”, deklaroi Rama.
Ndër të tjera, Rama paralajmëroi nisjen e një rivlerësimi të thellë ligjor për të gjitha universitetet e vendit, për të parë nëse deklarimi i pagave të pedagogëve realizohet komfort ligjit në fuqi.
“Për pagat është bërë një vlerësim i parë vite më parë, por nuk është e thënë që dikush që i ka plotësuar të gjitha 7 vite më parë i këtë prapë të gjitha të plotësuara.Është bërë disa vite më parë, publike dhe private me procesin e rankimit për të parë deri në fund konformitetin me ligjin, jo si një gjë teknike por si esencë në funksion të performancës, sa kemi pedagogë që për shkak të një page jo plotësisht të kënaqshme shkon në universitet privat, aty tjetër deklarojnë, tjetër marrin. S’mund ta pranojmë të kemi pedagogë të regjistruar në librin e pagave sikur punojnë në fason, duhet t’i bëjmë një thirrje universiteteve private dhe pedagogëve që nëse ka mospërputhje duhet ta deklarojnë se procesi do të shkojë në kontrollin e pasurisë siç e bën gjithë bota. Më tregon qe ke kaq e aq dhe ke dy vetura, më fal por ku i gjen këto? Nuk i gjen nga aktiviteti kriminal, por nga fshehja e të ardhurave”, tha Rama.
