Në kuadër të fillimit të vitit të ri akademik, Unioni i Këshillave Studentorë së bashku me organizata rinore dhe përfaqësues të tjerë të universiteteve, zhvilluan një takim ku diskutuam mbi problematikat që po përballen.
Në përfundim të këtij bashkëbisedimi, konkluduan në disa kërkesa të cilat njoftojnë se do i adresojnë si shkresë Ministrisë së Arsimit dhe institucioneve përkatëse.
“Në tryezën e bashkëbisedimit ‘Student-ON’, organizuar nga Unioni i Këshillave Studentorë në bashkëpunim me studentë përfaqësues të universiteteve si dhe organizata rinore e studentore diskutuam mbi mbështetjen e munguar ndaj studentëve dhe të rinjve. Nisur nga situata aktuale me të cilën po përballet vendi ynë, së pari shprehim qëndrimin tonë në përkrahje të protestës së pedagogëve dhe kërkesave të tyre të drejta, në shërbim të përmirësimit të cilësisë së sistemit arsimor në vend. Në vijim të shqetësimeve të vazhdueshme të shprehura, ashtu si dhe të diskutuara në këtë takim, vendosëm të drejtojmë këtë kërkesë Ministrisë së Arsimit dhe institucioneve shtetërore përgjegjëse, duke konkluduar në disa pika”, bën me dije Unioni i Këshillave studentorë.
Kërkesat
- Rritje e mbështetjes ndaj sistemit të Arsimit të Lartë, duke rritur përqindjen e dedikuar për arsimin në buxhetin e shtetit në normën 4%;
- Ulje e tarifës së studimit për të gjithë nivelet e studimit duke indeksuar tarifat në nivelin 2-fish (dyfish) të normës aktuale të inflacionit;
- Mbështetje për kostot e akomodimit dhe artikujt shkencorë/libra shkollorë duke bërë funksionale uljet prej minimalisht 20% nëpërmjet Kartës së Studentit, si dhe ofrimin e shërbimit dhe aksesit në Bibliotekës Online.
