Qeveria vijon të mos bëjë transparencë lidhur me fatin e ndërtimeve pa leje që konfiskoi në bazë të një vendimi të ri të Këshillit të Ministrave.
Ministrja e Shëndetësisë, Ogerta Manastirliu u pyet këtë të Enjte si përfaqësuesve e qeverisë nëse ka marrëveshje mes ndërtuesve që ju konfiskuan ndërtimet pa leje dhe qeverisë.
Dy javë më parë qeveria ndërmori një aksion për konfiskimin e kateve shtesë pa leje. Në dy javë janë bërë vetëm dy konfiskime. Çfarë po ndodh me këtë aksion a është ndërprerë dhe a ka një marrëveshje mes qeverisë dhe pronarëve të dy objekteve që janë konfiskuar?
“Duhet që të kuptojmë diçka që është shumë me rëndësi, s’kemi ndërhyrë dhe s’do e bëjmë asnjëherë të ndërhyjmë në vendimet e organeve ligjzbatuese, organeve kompetente. Por nga ana tjetër, ky është një vendim i qeverisë i cili ka për qëllim kryesore pikërisht dekurajimin e ndërtimeve pa leje në Republikën e Shqipërisë”, tha Manastirliu nga foltorja e ngritur para kryeministrisë për ligjëratat pas mbledhjes së qeverisë. Pyetjes zgjodhi ti bëjë bisht, duke mos bërë transparencë.
Dy javë më parë, ministrat Çuçi dhe Balluku njoftuan konfiskimin e dy ndërtesave pa leje në Farkë: një godine 9-katëshë të biznesmenit Lulzim (Lul) Morina si dhe shtesa kati me sipërfaqeje prej 1200 m² në një kompleks në ndërtim nga kompania e Pëllumb Salillarit.
Ministrat njoftuan se konfiskimi bazohej në një vendim që qeverisë, që u zbardh disa ditë pas aksioneve.
Vendimi i qeverisë është cilësuar gjegjësisht nga ekspertë të drejtësisë si dhe opozita si një amnisti për ata që ndërtojnë pa leje, pasi parashikon që të shmanget përgjegjësia ligjore për shkelësit e ligjit. Sipas vendimit, ndërtuesit mund ta falin sipërfaqen pa leje ose ta parablejnë me çmimin e tregut. Në këtë mënyrë, i shpëtojnë përgjegjësisë penale, kanë artikuluar ministrat Cuçi dhe Balluku.
