Ministri i Brendshëm njoftoi këtë të Premte konfiskimin e një tjetër sipërfaqeje ndërtimi pa leje në Farkë, pas një pallati 9-katësh të biznesmenit Lulzim Morina një ditë më parë.
Ashtu si Belinda Balluku, Çuçi postoi një video në faqen e tij në FB ku shfaqej krah drejtueses së IKMT-së Dallandyshe Bici dhe Rebani Jaupit, drejtues në polici. Ai njoftoi se janë zbuluar 1200 m² shtesa kati pa dokumentacionin e nevojshëm ligjor. Shtesa pa leje është në kompleksin e pallateve në ndërtim e sipër nga firma e Pëllumb Salillarit.
Çuçi u shpreh se ndërtuesi mund ti shpëtojë përgjegjësisë penale nëse parablen shtesën me çmimin e tregut të indeksuar ose ia dhuron shtetit, edhe pse për raste të ngjashme nga policia është proceduar me arrestime dhe janë ngritur akuza për veprën penale “Ndërtimi i paligjshëm” ndaj ndërtuesit.
“Në zbatim të vendimit të qeverisë, këtij subjekti do t’i lihet dy opsione në dispozicion. Opsioni i parë është ta parablejë shtesën që është jashtë lejes me çmimin e tregut të indeksuar, dhe në rastin kur e parable këto para do të shkojnë në dispozicion të Agjencisë së Shpronësimeve, në mënyrë që të paguhen shpronësimet për qëllime publike. Opsioni i dytë ta dhurojë këtë volum ndërtimi dhe në këtë rast këto kate shkojnë në favor të entit të banesave për të akomoduar shërbimin social. Nëse nuk zgjedh asnjë opsion do të konfiskohet në bazë të ligjit për interes publik. Nëse zgjedh dy opsionet e para menjëherë nis procesi i legalizimit, dhe I gjithë objekti shkon për t’u legalizuar dhe në këtë rast shmanget edhe ndjekja penale. Në të gjitha rastet, gjoba do të paguhet”, u shpreh Çuçi, duke deklaruar se aksioni i konfiskimit bazohet në një vendim të fundit të qeverisë, që për hir të së vërtetës vijon ende të mbetet ende sekret, dy ditë pas njoftimit verbal.
Pëllumb Salillari, pronari i kompleksit ku u konstatua sipërfaqja pa leje është cilësuar një biznesmen me lidhje të ngushta me kreun e qeverisë Edi Rama. Kompania e tij “Salillari” ka përfituar tendera të shumë gjatë qeverisjes socialiste, shumë prej të cilave me dyshime të forta si procedura korruptive.
Një prej tyre është edhe kontrata 3.61 miliardë lekë të vjetra e lidhur me bashkinë e Kuçovës për ndërtimin e ujësjellësit. Për projektin banorët e zonës kanë ngritur shqetësimin se parashikon shkatërrimin e burimit të Sinecit, një bukuri e rrallë natyrore në zonë. Ata kanë bërë edhe një kallëzim në SPAK, gati një vit më parë.
Opozita po ashtu ka hedhur akuza po ashtu akuza për bashkëpunim korruptiv të biznesmenit me qeverinë. “Salillari duket se ka aksione të përbashkëta me Ramën, i cili personalisht dhe direkt i bënë avokatin e tij ndaj dhe ai vazhdon të fitoj tendera me 99.9% si ofertues i vetëm. Kësaj i thonë vjedhje dhe vetëm vjedhje me firmë qeveritare”, do të shprehej ish-kryeministri Sali Berisha në një reagim të disa javëve më parë.
