Nga Boldnews.al
Kryetari i Bashkisë së Vorës, Blerim Shera, është përfshirë në një aferë me biznesin “e pistë” të pastrimit të qytetit. Prej disa muajsh, kjo bashki ka bërë disa procedura tenderuese për plehrat, por që kanë hedhur hije të mëdha dyshimi se Shera po favorizon firma të caktuara.
Dhe, me këtë aferë, ai rrezikon që të jetë në “gjurmët” e paraardhësit, Agim Kajmaku. Por, nëse Kajmaku u fundos nga e kaluara, Shera duket se do të fundoset nga vendimmarrja, pasi për rreth 30 ditë ai ka shpallur fitues të njëjtën firmë për pastrimin për 3 vite dhe për pastrimin urgjent për 90 ditë. Por, nëse SPAK nuk ndërhyn urgjent në këtë procedurë, atëherë gjithë të tjerët të qëndrojnë të qetë!
Sipas dokumenteve që disponon BoldNews.al, mësuesi dhe psikologu i Vorës, Blerim Shera, tashmë kryetar i bashkisë, përshpejtoi procedurat e një tenderi me objekt “shërbimi i pastrimit dhe largimit të mbeturinave për Bashkinë Vorë, 36 muaj (3 vite nga dita e nënshkrimit të kontratës)”. Në këtë tender morën pjesë “Alko Impex” me vlerë 266.880.370 lekë pa TVSH. B.O.E Cogren & A.E.K&Co me vlerë të ofertës 239.981.138 lekë, ED Konstruksion me vlerë 273.395.778 lekë. Ndërkohë, fituesi B.O.E Kurora & V.A.L.E Recycling ofruan 270.866.703 lekë, ndërkohë firma REJ kishte një ofertë me vlerë 240.582.685 lekë.
Siç duket edhe nga ofertat, ato që ofruan më pak se Kurora u s’kualifikuan, disa me arsye qesharake pasi s’kanë paraqitur autorizim prodhuesi për dezinfektimin e kontenierëve, apo s’ka pasur dokumente për mjetet. Ndërkohë, firma REJ, sipas Bashkisë së Vorës, ka pasur asnjë dokument që disponon mjetet, ndërsa “Alko Impex” s’ka pasur drejtues teknik.
Por, nëse më sipër faktuam se në mes të muajit gusht u shpall fituese kompania “Kurora” dhe “V.A.L.E Recycling” që ofruan 270.866.703 lekë për pastrimin për 3 vite, Bashkia e Vorës vijoi një tjetër procedurë. Sipas dokumenteve që disponon BoldNews.al, në datën 15 shtator 2022, kryetari Blerim Shera e ka shpallur sërish fituese firmën “Kurora” për procedurën “me negocim pa shpallje paraprake të njoftimit të kontratës”. Bëhet fjalë për tenderin me objekt “shërbimi i pastrimit të mbeturinave, emergjenca 90 ditë”. “Me anë të kësaj ju informojmë se ka marrë pjesë në këtë procedurë firma ‘Kurora’ me vlerë 22.330.674 lekë pa TVSH, ose rreth 220 mijë euro me TVSH”.
Pra, e njëjta firmë e cila u shpall fituese edhe në mes të muajit gusht 2022. Një aferë e dyshimtë, pasi për rreth 30 ditë, e njëjta firmë shpallet fillimisht fituese e tenderit të madh dhe pas disa ditësh fiton një tjetër tender pastrimi emergjent për 90 ditë.
Nëse është pezulluar procedura e madhe, përse nuk bëhet publike? Dhe, përse në tenderin e madh, Blerim Shera, i s’kualifikoi të gjithë?! Për të gjitha këto pyetje, përgjigje mund ti japë vetëm institucionet ligjzbatuese, pasi vendimmarrja e Sherës është e qartë, në dy raste ka favorizuar dukshëm një firmë. Duke i dhënë miliona euro.
