Një ditë pas njoftimit verbal të një vendimi qeverie për konfiskimin e ndërtimeve pa leje, zëvendëskryeministrja Belinda Balluku tha se këtë të Enjte është kryer aksioni i parë. Bëhet fjalë për një godinë 9-katëshe pa leje e biznesmenit Julian Morina.
VKM ende sekrete
Në një video të postuar në FB, ajo shfaqet krah një drejtuesi të policisë dhe shefes së re të IKMT Dallëndyshe Bici dhe njofton konfiskimin e një godine në Farkë. Balluku thotë se janë 7 kate mbi tokë dhe dy nëntokë, pa leje.
Në video, zëvendëskryeministrja shprehet se vendimi për konfiskimin u mor bazuar “në VKM-në e djeshme”.
“E kemi bërë publike atë VKM”, thotë Balluku në video.
Ditën e djeshme, pas mbledhjes së Qeverisë, zëvendëskryeministrja njoftoi verbalisht se në bazë të një vendimi qeveri të sapomarrë, ndërtesat pa leje apo katet pa leje, do të konfiskohen për tu përdorur për “interes publik”.
“Vendimi i miratuar sot nga Qeverisa ka të bëjë me ndërtesat pa leje, siç ka një trend për ndërtimin e shtesave mbi lejet që ka dhënë bashkia. Ky trend ka një sjellje, që leja është me 7 kate, bëhen me 3 kate të tjera shtesë. Këto nuk do tolerohen më, do konfiskohen dhe do të merren për përdorim publik. Ky është proces i gjatë dhe që ka për qëllim dekurajimin e kompanive ndërtuese. Për çdo ndërtesë që ka shkelur lejen apo që ka ndërtuar pa leje do ketë investigim edhe për institucionet që kanë për detyrë të mintorojnë u kanë kaluar këto ndërtime nën hundën e tyre. S’do ketë tolerancë për ndërtuesit. Ndërtuesve do i jepet mundësia të parablejë këto kate shtesë dhe do marrin gjobë! Ndërtuesit do i falin këto hapsira dhe e tjera është që ndërtuesve do u konfiskohet dhe do dërgohet për ndjekje penale”, tha Balluku.
Ajo shtoi se në ditët në vijim do ketë komunikime të tjera publike për vendimin, që në fakt vijon të mbetet sekret. Nga një kërkim në faqen zyrtare të kryeministrisë ku njoftohen VKM-të, në datën e djeshme nuk eksiton një vendim për konfiskimin e ndërtesave pa leje. As në Fletoren Zyrtare nuk ka asnjë shenjë. Ndërkohë, një tjetër vendim i njoftuar dje pas mbledhjes së qeverisë ishte emërimi i drejtorit të ri të Policisë së Shtetit, që ndryshe nga ai për konfiskimet, është publikuar.
Ndërtesa pa leje e biznesmenit problematik
Mësohet se ndërtesa në Farkë është në pronësi të biznesmenit Julian Morina, i njohur si Lul Morina.
Morina njihet si problematik në këtë aspekt, ndërsa më herët “Boldnews” ka raportuar se si ai kishte ndërtuar një godinë pa leje në Dhërmi.
Në një raportim mediatik gati një vit më parë nga “occrp.org”, Lul Morina përshkruhet si biznesmen me lidhje me familjarët e kryeministrit Edi Rama dhe partner biznesi i familjes indiane Sandesara, në kërkim nga shteti i tyre për mashtrim me vlerë 700 mln USD dhe pastrim parash.
