Kryetari i Partisë së Lirisë, Ilir Meta i ka bërë thirrje qytetarëve që të marrin pjesë në protestën përballë inceneratorit të Tiranës të cilën e quajti si një “vend krimi”.
Gjatë një deklarate për mediat, Meta tha “koka” i korrupsionit dhe kësaj afere mafioze është kryeministri Edi Rama. Kritika, Meta kishte edhe për drejtësinë, për të cilën tha se nuk po vepron, pasi është kapur për fyti nga partia në pushtet.
“Dua t’i falenderoj të gjithë qytetarët që kanë shprehur sensibilizimin e tyre lidhur me këtë çështje sidomos qytetarët e kryeqytetit që janë të parët që vidhen përmes kësaj afere mafioze që çdo ditë gjeneron dhjetëra mijëra euro në funksion të “kokës” së kësaj afere që është vetë kryeministri Edi Rama. I ftoj qytetarët të jenë të pranishëm në këtë skenë krimi që ndodh përmes vjedhjes së taksave të tyre dhe përmes mashtrimeve të qeverisë. T’i japim fund njëherë e përgjithmonë indiferencës me këtë shkatërrim që po i ndodh kombit dhe ekonomisë. Të bëhemi të gjithë bashkë në mënyrë që të mos vajtojmë vitin e ardhshëm statistikat në nisjen e shkollave. Ndaj i ftoj të gjithë të jenë atje, për të parë me sytë e tyre këtë skenë krime dhe për të vënë gishtin mbi faktet. Për fat të keq drejtësia ka kohë që nuk i shikon për arsye se partia në pushtet e ka zënë për fyti. Jane parate e qytetareve që duhet të shkojnë dhe tu kthehen në shërbime atyre dhe jo që te vidhen hapur nga mafia, sepse kështu i intereson Edi Ramës”, tha Meta.
Aksioni opozitar i Ilir Metës nis nga inceneratori i Tiranës, pasi sot në orën 18:00 do të zhvillohet protesta e parë për muajin shtator. Kryetari i Partisë së Lirisë, Ilir Meta njoftoi se do të organizojë një tubim pranë impianti të trajtimit të mbetjeve në Sharrë si simbol i korrupsionit qeverisës.
