Nga Boldnews.al
Vendimi i Belinda Ballukut për të konfiskuar pallatin pa leje të biznesmenit të afërt me qeverinë, Julian Morina (Lul Morina) trazoi disi mjedisin e pronarëve të kompanive të ndërtimit mesditën e së Enjtes.
Më pas, ujërat u qetësuan si me “magji”. Mesazhi se ishte gjetur një “akord” mes kryeministrit Edi Rama dhe biznesmenit Morina, sheshoi të gjithë zhurmën e ngritur në gotë.
Por, çfarë ndodhi në mesditë dhe si u arrit tek “qetësimi i ujërave”.
Zv.kryeministrja Belinda Balluku, e shoqëruar nga drejtuesja e Inspektoratit Kombëtar Ndërtimor Urbanistik, Dallëndyshe Bici, u paraqitën në godinën 9-katëshe të Lul Morinës, në zonën e Liqenit të Thatë në Tiranë, nga ku u deklarua konfiskimi i tij, për shkak se ishte ndërtuar pa leje.
Balluku madje e konsideroi “mister” se si ishte lejuar një godinë e tillë të ndërtohej pa asnjë dokument.
Zëvendësja e Ramës deklaroi se Lul Morina kishte dy mundësi për të shpëtuar nga ndjekja penale tashmë që ishte kapur në shkelje; ose të dhuronte godinën në favor të shtetit, ose ta blinte atë me çmimin e tregut.
Ajo nuk e shpjegoi se si do të llogaritej vlera e tregut, në rast se Morina vendosi që të paguajë për ndërtesën e tij të paligjshme.
Edhe Ministri i Brendshëm, Bledi Çuçi, në një intervistë në mbrëmjen e së Enjtes për Top Channel, nuk ishte në gjendje të saktësonte se si do të caktohej vlera e tregut në rastet e konfiskimit të godinave pa leje.
Ndërkohë që bëheshin këto deklarata në publik, në një ambjent tjetër, në mbrëmjen e së njëjtës ditë, larg syve kureshtarë, Edi Rama besohet se ka zhvilluar një takim me biznesmenin Julian Morina.
Persona që kanë dijeni për këtë takim deklaruan për “Boldnews.al” se mes Ramës e Morinës është arritur “paqja” dhe biznesmeni do të blejë godinën e tij me 350 euro për metër katrorë.
Ky çmim është shumë larg vlerës së tregut, e cila në atë zonë ku gjendet godina pa leje arrin në rreth 2 mijë euro për metër katrorë.
Të njëjtat burime deklaruan për redaksinë se, me arritjen e këtij akordi, biznesmeni fitoi një mënyrë për të “legalizuar” me kosto të ulët një ndërtim shumë-katësh të paligjshëm.
Natyrisht, Morina do të duhet të paguajë edhe një gjobë për ndërtimin pa leje, e cila, në çdo rast do të jetë e papërfillshme krahasuar me të ardhurat që do të sigurohen nga shitja e apartamenteve dhe dyqaneve.
Megjithatë, këto të dhëna janë të siguruara në mënyrë konfidenciale dhe vërtetësia e tyre do të konfirmohet ose jo, në rast se qeveria do të bëj publike më tej ecurinë me pallatin e “konfiskuar” të Lul Morinës.
