Ngjarja e ndodhur në Himarë, mesditën e së martës, ku një 7 vjeçare humbi jetën pasi u godit nga një skaf që drejtohej nga komisari i policisë, Arjan Tase, ka shkaktuar reagime të shumta dhe revoltë në rrjetet sociale.
Vogëlushja sot u përcoll në banesën e fundit. Polici që shkaktoi tragjedinë është arrestuar, ndërsa ka një seri reagimesh në rrjet ndaj mesazheve cinike të Kryeministrit Edi Rama. Ky i fundit flet për një sezon turistik të mirë, vetëm pak orë pasi një vogëlushe humbi jetën dhe një familje u shkatërrua shpirtërisht.
Dhe mes mesazheve, akuzave e kundërakuzave, ka edhe dy politikanë që as kanë folur dhe as kanë reaguar, qoftë edhe në aspektin njerëzor.
I pari është Presidenti Bajram Begaj, i cili minimalisht mund të jepte një mesazh njerëzor dhe ngushëllues për familjen. Ai është Presidenti i Republikës dhe viktima ishte një vajzë e vogël, qytetare e këtij vendi, familja e së cilës kishte emigruar dhe ishte rikthyer për pushime në këtë vend. Si President, Begaj duhej të kërkonte zbardhjen e ngjarjes, marrjen e përgjegjësive nga institucionet, qofshin edhe ato policët e shkarkuar apo pezulluar nga Gledis Nano. Jo Begaj zgjodhi “të flasë” me heshtjen e tij. Kaq mjafton për të kuptuar se ai humbi jo si President, por edhe si mjek, profesion të cilin e ka ushtruar për vite me rradhë, para se të emërohej apo dekretohej në krye të Forcave të Armatosura.
I dyti që nuk reagoi, ishte Lulzim Basha, ish-ministër dhe deri para ca muajsh edhe kryetar i opozitës. Basha heshti edhe pse mund të jepte një mesazh, në aspektin njerëzor, edhe pse po të ishte në krye të PD, me siguri do të shfaqej 3, 4 apo më shumë herë dhe do të bënte thirrje për protesta.
