I ftuar në studion e “Fax News” aktivisti politik Ardian Isufi u shpreh mbi ngjarjen tragjike në Himarë si një rast absolutisht i paralajmëruar, duke qenë se në pak kohë kanë ndodhur incidente të shumta në vend.
Shkarkimet në radhët e policisë ai nuk i cilësoi si efektive pasi janë më shumë si një formë për tu dukur, dhe nuk ka ende një plan afatgjatë për të garantuar sigurinë publike.
“Padyshim është një ngjarje e paralajmëruar sepse kanë ndodhur disa incidente, sot flamuri shqiptar duhet të ulej në gjysëm shtizë sepse forma e të të sjellurit të individit në shoqëri, është një situatë që na çon te një arkaizëm që nuk ka lidhje fare me kohët moderne.
Është situata më e rendë për të kuptuar funksionimin e shtetit dhe sa e respektojmë ne njëri-tjetrin. Një fëmijë i vogël që po rrinte në breg të detit dhe krijohet kjo situatë, që as në imagjinatë nuk e çon dot, e tani e kemi faktike. Mund ti ndodhte kujtdo nga ne, në këtë sens duhet të sensibilizohet shoqëria e shteti.
Reagimi popullor aktiv është një parashikim pozitiv, pavarësisht masave nga policia të vonuara, duken si të forta por policia shqiptare ka nevojë për riformatim. Këto shkarkimet në radhët e tyre i shoh si shkarkim nervi sesa si domosdoshmëri, nuk mund të merremi me qetësinë publike vetëm kur vjen korriku por duhet plan afatgjatë për të gjithë vitin.
Pse mos të kemi ndërgjegjësime në komunitet të banorëve, të strukturave të policisë dhe këto lloj formash bëhen për tu dukur para Europës.Duhet reflektim i fortë, jo dite, duhet plan madhor! Padyshim shoqëria civile duhet të çohet, sepse janë momente të forta”-u shpreh Isufi.
