Nga Boldnews.al
Presidenti i Republikës, Bajram Begaj, është i mendimit se Gjykata Kushtetuese i ka ngritur “kurt”, kur i pezulloi dekretin për zgjedhjet në Tiranë, pas shkarkimit të diskutueshëm të kryebashkiakut të arrestuar, Erion Veliaj.
Në një shkresë të mbushur plot mllef, kreu i Shtetit, që është edhe Garanti i Kushtetutës, ka lëshuar një mori akuzash ndaj trupës gjyqësore kushtetuese, e cila vendosi njëzëri pranimin e kërkesës së Veliajt për të pezulluar përkohësisht dekretin e Begajt për zgjedhjet e pjesshme lokale në kryeqytet, në 9 nëntor.
Në parashtrimet e tij, Presidenti dhe grupi i këshilltarëve kanë parashtruar pak a shumë të njëjtat argumenta që publikuan në 1 tetor 2025, ditën që u nënshkrua dekreti për zgjedhjet lokale.
Por, teksti i parashtrimeve të Presidentit është i mbushur me insinuata shumë të rënda për Gjykatën Kushtetuese, duke krijuar një atmosferë tensioni në nivele të panjohura deri më tani ndërmjet dy institucioneve.
Më poshtë, janë disa nga pasazhet e dokumentit që Presidenti Bajram Begaj i ka dërguar së fundmi Gjykatës Kushtetuese, për seancën e 31 tetorit. Ai ka kërkuar që Kushtetuesja të heqë pezullimin e dekretit dhe lejimin e zgjedhjeve lokale në Tiranë. Por, këtë kërkesë e ka bërë në tejkalim të çdo lloj kodi normal komunikimi ndërmjet institucioneve kushtetuese.
“Konsideratat” e Begaj
“…Nuk ka asnjë shpjegim logjik dhe të arsyeshëm që të bindë palët e përfshira për faktin se pse Gjykata Kushtetuese ka injoruar tërësisht aktet zyrtare të disa institucioneve dhe qëndrimin e tyre të qartë…”.
“…Një izolim kaq flagrant ndaj qëndrimit të institucioneve të shtetit për çështjen thelbësore të kompetencës së Gjykatës Kushtetuese nuk shpjegohen dot me arsye që pranohen nga logjika…”.
“Gjykata Kushtetuese nuk mund të injorojë faktin që Presidenti i Republikës ka në dispozicion 48 orë për shpalljen e datës së zgjedhjeve, se ai nuk ka opsion të mos i zbatojë dispozitat ligjore në fuqi e t’i konsiderojë ato antikushtetuese, sikurse nuk mund të parashikojë që Gjykata Kushtetuese në këtë rast do të ndihet kompetente, pavarësisht se ligji kompetencën (për këtë rast) ia njeh Gjykatës Administrative…”
“…Gjykatës Kushtetuese i ndalohet kategorikisht nga Kushtetuta që, me aktet e veta, të krijojë konflikte, të destabilizojë rendin kushtetues apo të minojë ushtrimin e ligjshëm të kompetencave nga ana e organeve kushtetuese. Ndërhyrja, në kohën e duhur, në përputhje me vullnetin e plotë të saj, por pa ngritur kurthe ndaj Presidentit dhe organeve të tjera kushtetuese, është përgjegjshmëri kushtetuese. Në këtë rast, kjo përgjegjshmëri i ka munguar kësaj gjykate në mënyrë flagrante…”.
“…Motivi që e ka shtyrë Gjykatës në këtë sjellje është i pashpjegueshëm me arsye që pranohen nga logjika…”.
