Disa mijëra qytetarë nga qarqe të ndryshme të vendit po vijnë drejt Tiranës për t´iu bashkuar protestës së thirrur nga Partia Demokratike dhe shoqëria civile.
Policia ka bërë kontrolle, por nuk ka krijuar probleme me autobuzët dhe makinat që janë me protestues drejt kryeqytetit, me përjashtim të një rasti.
Një përplasje ka ndodhur në rrugën e Kombit kur u desh ndërhyrja e drejtorisë së Përgjithshme të Policisë së Shtetit që autobuzi me militantë të PD të vazhdonte udhën drejt Tiranës.
Nga Shkodra dhe Fieri mësohet se janë organizuar disa mijëra qytetarë, ndërsa Elbasani është bllokuar nga moria e makinave me flamurin e PD, të cilët do të nisen drejt kryeqytetit nga ora 18.00.
Po kështu çdo rreth ka bërë organizimin e tij me autobuzë apo mjete private të vogla.
Kreu i PD, Sali Berisha, ka premtuar se do të jetë protestë gjigande dhe pa sherre e dhunë. Kjo do të jetë, sipas Berishës, fillimi i një seri pa ndalesë protestash që do të vazhdojnë në vjeshtë.
Gjithashtu janë paralajmëruar surpriza gjatë zhvillimit të protestës, e cila do të monitorohet nga të paktën 1200 policë dhe agjentë civilë. Nga raportimet e ndryshme mësohet se në tribunë do të ngjiten për të dhënë mesazhe përfaqësues të shoqërisë civile, grupeve të interesit, diasporës, emigracionit dhe pritet që fjalimi përmbyllës të jetë ai i kreut të PD, Sali Berisha.