Parlamenti bullgar ka kaluar një rezolutë për heqjen e vetos mbi fillimin e bisedimeve të pranimit në BE me Shkupin, bazuar në një propozim të presidencës franceze të Këshillit të BE.
Lajmin e konfirmojnë mediat bullgare që raportojnë se deputetët miratuan propozimin francez me 170 vota pro. 37 votuan kundër dhe 21 abstenuan.
Çështja u vendos si pika e parë e rendit të ditës së Kuvendit, në mbledhjen e kësaj të Premteje.
“Ky është hapi i parë drejt marrjes së dritës jeshile për heqjen e vetos dhe fillimin e negociatave midis Maqedonisë së Veriut dhe BE-së. Tashmë propozimi duhet të pranohet nga Këshilli i Ministrave, i cili do ta dërgojë në Bruksel”, sqaron media bullgare “NOVA”.
Ndërkohë, samiti i radhës i BE-së pritet të mbahet në Tetor.
Gjatë konferencës së djeshme në Bruskel pas mbledhjes së samitit të BE-së, kryeministri Edi Rama fajësoi veton bullgare për mos hapjen e negociatave për Maqedoninë e Veriut dhe Shqipërinë, që po trajtohet nga BE si një çështje e vetme.
Rama lëshoi akuza ndaj palës bullgare dhe këtë të Premte pati replika mes tij dhe ministrisë së Jashtme bullgare.
Ndërkohë, kryetari i PD-së Sali Berisha u shpreh se mos hapja e negociatave nuk erdhi për shkak të vetos bullgare, por sipas tij, qeveria e Ramës nuk i ka përmbushur kushtet e vendosura nga BE.
