Kreu i PD, Sali Berisha ka dalë në konferencën e përjavshme për mediat, ku ka komentuar samitin e BE-së për Ballkanin Perëndimor si dhe konferencën e Ramës me kryeministrin e Maqedonisë së Veriut, Dimitar Kovaçevski dhe Presidentit serb Aleksandër Vuçiç.
Berisha u shpreh se nuk është vetoja Bullgare që pengon integrimin në BE, por sipas tij, qeveria e Ramës nuk ka plotësuar kushtet e BE-së.
Sipas kreut të PD, Rama në Bruksel dëshmoi se është i rreshtuar jo me Ballkanin e Berlinit apo Brukselit, por me Ballkanin e Beogradit dhe Putinit.
“Ky është udhëtimi që dëshmoi përfundimisht se Edi Ramës nuk i hapin negociatat. Nuk e pranojnë për interlokutor dhe se në mënyrë absolute shkaqet themelore nuk është Bullgaria, por siç ja tha vetë padroni i tij Vuçiç janë disa vende të BE, të cilat nuk janë dakord me hapjen e negociatave me Shqipërinë. Nuk janë dakord me hapjen e negociatave me Shqipërinë se Shqipëria nuk ka plotësuar kushtet, përkundrazi në drejtim të lirive të qytetarëve, votës së lirë dhe mediave ka shënuar rrokullisje të mëdha. Nuk është vetoja e Bullgarisë për Shqipërinë por është regresi i demokracisë në Shqipëri e mos plotësimi i kushteve nga qeveria e Ramës. Nëse lexoni të gjitha deklaratat para e gjate samitit te Rames ato faktojnë katërcipërisht se ky zotëri shkoi në Bruksel jo si përfaqësues i Shqipërisë por si vasal i Aleksandër Vuçiç. Dhe u soll atje sikur të ishte Milorak Dodik, Presidenti i Republikës serbe të Bosnjës dhe jo kryeministër i Shqipërisë. Shkoi në Bruksel e faktoi se ishte përfaqësues i aleancës trilaterale të serbomadhit Vuçiç. Me deklaratat e qëndrimet e tij Rama dëshmoi se është i rreshtuar jo me Ballkanin e Berlinit apo Brukselit por me Ballkanin e Beogradit dhe Putinit”, tha Berisha.
Kryetari i Partisë Demokratike dënoi fyerjet që sipas Berishës, Rama i bëri Bullgarisë dhe BE-së.
“Turpi të mbulojë Ramën për sulmet ndaj Bashkimit Europian. Bullgaria është një vend mik. Kemi gjetur në atë komb vetëm miq. Bullgaria ka qenë një avokat i Shqipërisë në luftën e Kosovës. Ky vassal i Vuçiçit nuk meriton të përfaqësojë Shqipërinë. Në emër të opozitës shqiptare i kërkojn ndjesë kombit bullgar për fyerjet e vasalit të Beogradit”, u shpreh Berisha.
