Tre anëtarët e rinj të Gjykatës së Lartë Sokol Ngresi, Margarita Buhali dhe Enton Dhimitri, kanë marrë sot zyrtarisht detyrën, në një ceremoni ku ishin të pranishëm edhe kryetarja e KLGJ, Naureda Llagami, si edhe përfaqësuesi i Presidentit të Republikës, Bledar Dervishaj.
Zëvendëskryetari i kësaj gjykate, Sokol Sadushi u shpreh se emërimi i tyre do të ndihmojë në gjykimin e më shumë çështjeve gjyqësore, në të tre kolegjet (administrativ, civil, dhe penal).
Ai e vlerësoi angazhimin e Këshillit të Lartë Gjyqësor për të sjellë gjyqtarët më të mirë në Gjykatën e Lartë, proces i cili kërkon natyrshëm kohë dhe profesionalizëm.
Kryetarja e KLGJ, Naureda Llagami u shpreh se ardhja e gjyqtarëve të rinj dhe të kualifikuar në Gjykatën e Lartë, rrit pritshmëritë për një drejtësi sa më cilësore dhe vendimmarrje sa më të shpejtë, për të bërë të mundur evadimin e numrit të lartë të çështjeve që presin të gjykohen.
