Saimir Tahiri do të vijojë të vuajë dënimin në qelitë e burgut.
Gjykata e Lartë refuzoi kërkesën e ish-ministrit të Brendshëm Tahiri për pezullimin e ekzekutimit të vuajtjes së dënimit me burgim.
Tahiri, i dënuar me 3 vjet e 4 muaj për shpërdorim detyre nga Apeli i Gjykatës së Posaçme më 4 Shkurt, kërkon lirimin nga qelia me pretendimin se i rrezikohet jeta në burgun e Fierit.
“Vendimi i Gjykatës së Posaçme të Apelit është vënë në ekzekutim menjëherë në kundërshtim me kërkesat e ligjit dhe në shkelje të të drejtave dhe lirive themelore të shtetasit Saimir Tahiri, pa respektuar procedurën ligjore. Duke parashtruar se në rastin konkret vuajtja e menjëhershme e dënimit me burgim e të pandehurit Saimir Tahiri, mund të sjellë pasoja të rënda për vetë të pandehurin si dhe për familjen e tij. Kështu, Z.Tahiri ka mbajtur funksionin e ish Ministrit të Brendshëm të Republikës së Shqipërisë ai rrezikon dhe mund të bëhet objekt i personazheve të krimit që ndodhen duke kryer dënimin në IEVP Fier”, shkruhej në kërkesën e ish-ministrit drejtuar gjykatës.
“Nga ana tjetër edhe familja e tij gjendet e ekspozuar ndaj pasoja të mundshme”, thuhej më tej në rekurs.
E teksa Tahiri kërkoi lirimin nga qelia, që iu refuzua nga gjykata, në një tjetër kërkesë drejtuar Gjykatës së Lartë, prokuroria kërkoi dënimin e ish-ministrit edhe për trafik droge.
