Situata në Ishullin e Sazanit është kritike, pranoi këtë të Hë ministri i Mbrojtjes Niko Peleshi. Flakët po përhapen me shpejtësi, ndërsa dhjetëra forca të zjarrfikëses ushtrisë dhe vullnetarë po përpiqen që të vënë nën kontroll zjarrin me mjete primitive.
Ministria e Mbrojtjes publikoi një video ku Drejtori i Përgjithshëm i Emergjencave Civile Haki Çako, i shoqëruar nga ekspertë zjarresh ndodhen në helikopter dhe po kryejnë atë që e quajnë një “rikonicion nga ajri mbi ishullin e Sazanit për të vlerësuar nevojën e ndërhyrjeve të mëtejshme por ende nuk ka një ndërhyrje nga ajri”.
Deri tani, mjetet e vetme me të cilat po punohet janë lopata, kazma e krehëra.
Sipas përgjegjësit të sektorit zjarrëfikës për mbrojtjen nga zjarri dhe shpërtimit në rast rreziku, Eduard Demo terreni është i vështirë: “Raportimet që më kanë bërë është se e kanë kufizuar. Por terreni është shumë i thyer dhe shumë i vështirë për tu menaxhuar. Kujdesi duhet të jetë shumë i madh pasi kemi informacione për plasje të municioneve të braktisura dhe të mbetura”
“Trupat tanë ndërhyjnë me mjete rrethanore. Kanë gjashtë pompa shpine por është vështirë të mbushen me ujë,por dhe me kazma e lopata”, tha ai për mediat.
Ende nuk është bërë asnjë ndërhyrje nga ajri, ndërkohë që përmes një shkrimi investigativ të publikuar pak ditë më parë nga BIRN u konstatua se helikopterët Cougar nuk ngrihen në ajër sepse janë jashtë gatishmerie..
Sot përmes një deklarate për shtyp, ministria e Mbrojtjes pranon se ka kapacitete të limituara dhe se këto helikopterë janë në nivelin e tretë të mirëmbajtjes, proces që bëhet vetëm nga uzina jashtë vendit, të specifikuara për këtë nivel modern pajisjesh.
Ndërsa një pjesë e helikopterëve Cugar të riparuar përmes praktikës së re të bashkëpunimit me Agjencinë e Prokurimit të NATO (NSPA) ndodhen në Shqipëri.
“Edhe vendet fqinje përdorin këtë mekanizëm për të përballuar nevojat e tyre ne raste emergjencash. Siç e kemi thënë edhe më parë kapacitetet tona të brendshme janë të limituara. Ndërkohë edhe vende si Turqia, Greqia apo Italia mbështeten te mekanizmi evropian, sepse emergjencat specifike natyrore nuk përballohen dot vetëm me kapacitete të brendshme”, thuhet në njoftimin e ministrisë.
Grupi i zjarrfikësve që është nisur ditën e sotme drejtë ishullit është grupi i katërt që niset për të luftuar me flakë.
Katër ditë më parë në ishullin e Sazanit ishte aktivizuar një tjetër vatër zjarri, e cila fal ndërhyrjes nga toka u shua për të mos lejuar përhapjen e flakëve. Flakët e rëna mëngjesin të dielës, 5 qershor, morën krejt tjetër përmasa. Eshtë hera e dytë që Ishullit të Sazanit i vihet flaka qëllimisht brenda harkut kohor të katër ditëve.
