Në një intervistë në A2CNN, kryetarja e komisionit të Integrimit Europian, Jorida Tabaku, foli për procesin e integrimit të Shqipërisë në Bashkimin Europian.
Tabaku u shpreh se kushtet nuk janë plotësuar nga vendi ynë, por theksoi në anën tjetër se edhe vendet e anëtare nuk janë treguar të drejta në disa raste.
“Vitet e fundit kemi parë deklarata shumë të forta dhe një mbështetje të jashtëzakonshme nga vendet anëtare, njëkohësisht edhe nga Shtetet e Bashkuara të Amerikës që lidhen me faktorë jo të brendshëm. Nuk ka pasur ndonjëherë mbështetje më të madhe nga ky komision dhe nga vendet anëtare se ç’ka pasur vitet e fundit, kjo, jo për faktin nëse Shqipëria i plotëson apo jo kriteret, pasi kjo është një çështje dhe vendim politik, të cilin vendet anëtare, pasi shikohet i lidhur edhe me faktorë që kanë lidhje me demokracinë, zbatimin e ligjit, me faktorë që kanë lidhje edhe me stabilitetin në rajon, duke e konsideruar integrimin në BE si një element shumë të rëndësishëm edhe për të mos zvarritur proceset e brendshme të vendeve.
Të gjithë janë koshient që kriteret nuk janë plotësuar, që disa nga vendet anëtare janë duke u fshehur pas vetos së Bullgarisë, duke thënë po, të vazhdojë procesi. Për ne si opozitë, këtë e shikojmë si një mundësi për të ecur përpara, pavarësisht faktit që gjykojmë që kriteret nuk janë plotësuar.
Integrimi është një mundësi për të ecur përpara, pasi për 8 vite vendi është mbajtur peng, këtu i referohem faktit që e nisëm me 3 kritere dhe përfunduam me 15 kritere. Kemi diskutuar me miqtë tanë europianë, por edhe me parti që janë pjesë edhe e partive simotra të djathta. Në disa raste, vendet anëtare janë treguar të padrejtë me Shqipërinë, duke thënë se “ju jeni duke ecur në një rrugëtim, ku një pjesë të kritereve i keni plotësuar dhe jeni duke u penguar nga veto e një vendi anëtar për Maqedoninë e Veriut, nuk është kjo e vërteta. E vërteta është që Shqipëria duhet ta kishte hedhur këtë hap 8 vitet të shkuara sepse i gjithë procesi është duke u mbajtur pezull”, tha deputetja demokrate.
Për Tabakun, metodologjia e re e zgjerimit po mban pezull avancimin e procesit.
“Për shembull, më e thjeshta prokurimi publik, lufta ndaj korrupsionit. Duket sikur ndodhemi në një mjegull, e cila po mban pezull të gjithë administratën publike, po ul dëshirën që kanë qytetarët shqiptarë për procesin e integrimit, po krijon paqartësi. Ndërkohë, kjo paqartësi është totalisht e panevojshme”, shtoi ajo.
