Policia e Shkodrës arrestoi 4 persona në kuadrin e operacionit të koduar rrjeta. Policia njoftoi se 4 të arrestuarit janë pjesëtarë të një grupi kriminal me veprimtari në fushën e narkotikëve.
Sipas njoftimit zyrtar, në këtë operacion janë sekuestruar një sasi e konsiderueshme vaji hashashi, kanabis i përpunuar në formë çokollate, armë gjahu, një sasi parash e sende të tjera.
Policia njoftoi se të arrestuarit janë:
H. U., 30 vjeç, banues në Shkodër, M. U. 26 vjeç, A. U., 36 vjeç dhe M. U., 72 vjeç të tre banues ne fshatin Mes, Shkodër.
Këta shtetas janë kapur gjatë operacionit, në Postribë, në momentin e shkëmbimit të lëndës narkotike.
Gjatë operacionit forcat policore gjetën dhe sekuestruan në cilësinë e provës materiale:
14 litra vaj hashashi;
65.6 gramë lëndë narkotike në formë çokollate;
Një armë gjahu, një sasi fishekësh, një sasi parash, 6 aparate celulare dhe 1 automjet.
Nën drejtimin e Prokurorisë vijon puna për evidentimin dhe kapjen e personave të tjerë të përfshirë në këtë veprimtari kriminale.
Materialet iu referuan Prokurorisë së Rrethit Gjyqësor Shkodër, për veprat penale “Prodhimi dhe shitja e narkotikëve”, “Pastrimi i produkteve të veprës penale” dhe “Prodhimi dhe mbajtja pa leje e armëve të gjuetisë dhe sportive”.
