Në studion e A-Show, ish-ministri i Financave Arben Malaj, komentoi edhe përplasjen që ndodhi në Elbasan, duke e cilësuar si një shenjë të keqe si edhe reagimin e Presidentit Meta në zyrat e FRD.
“Pjesa emocionale e reagimit Presidentit Meta nuk është diçka e re në politikën shqiptare, është brenda vetvetes së tij. Sigurisht ne jemi mësuar që figurat politike të ruajnë një lloj vetëkontrolli.
Kujtojmë këtu ndryshimet kushtetuese, protesta që bëri Meta si lider i LSI ishte deri aty sa shkoi edhe në zaptimin e foltores, por thelbi i protestës ishte i saktë. Sepse sot nuk kemi individë në Kuvend që t’u shërbejnë votuesve. Në këtë rast reagimi mund të ishte më i moderuar, por ndoshta ngjarja ishte spontane dhe reagimi nga pikëpamja emocionale mund të ishte i mbingarkuar.
Në atë që u dha në television, nëse e ke toleruar 4 vite nuk ke pse 40 ditë para zgjedhjeve të krijosh një incident sido që të jetë poltik, sepse nuk i shërben askujt.
Ajo që ndodhi në Elbasan është prapë mesazh i keq. Cili është risku?
BE nuk i hap negociatat për shkak të problematikës me krimin e organizuar, korrupsionin, keqqeverisjen. Politikanët tanë duhet të mbajnë parasysh që çfarë do mbjellin tani do jenë edhe pritshmëritë pas zgjedhjeve.’
