Imunologu Genc Sulçebe u shpreh mëngjesin e sotëm se rritja e rasteve të reja me Covid-19 ka ndodhur për shkak të disa faktorëve, që nisin me kushtet e motit, ulja e temperaturave, mosmbajtja e maskave në ambiente të mbyllura, apo edhe grumbullimet.
“Sot jemi në kushtet kur njerëzt rrinë më shumë brenda se sa jashtë. Mos harroni se për shkak të temperaturave nuk mund të bëhet as ajrosja e ambienteve të brendshme, ashtu siç mund të bëhej gjatë muajve të ngrohtë. Janë edhe festat apo grumbullimet e ndryshme në salla apo zyra, ku mbajtja e maskave është e domosdoshme”, tha imunologu Sulçebe.
Në studion e Abcnews, imunologu i njohur tha se varientet e reja të Covid-19 kanë pothuajse të njëjtat simptoma, nuk ka të dhëna që janë më të rrezikshme, por përhapen më shpejt.
“Personat që kanë ngarkesë të ulët virale mund të mos identifikohen përmes testeve të shpejta, pra mund të dalin fals negative. Këto teste kanë ndjeshmëri më të ulët se testet PCR”, tha imunologu Sulçebe.
Lidhur me atë që quhet imuniteti i tufës, Sulçebe tha sipas përllogaritjeve të përafërta, në Tiranë ritmi i shpërndarjes së virusit është 5-6 % në muaj dhe sipas përllogaritjeve tona 40 % e qytetarëve e kanë kaluar, atëherë në fund të qershorit duhet ta kemi arritur imunitetin e tufës të paktën në qytetin e Tiranës.
“Në bazë të studimit që kemi bërë, nëse në fund të qershorit ishim 7 % në fund të dhjetorit ne shkuam 45 %, pra me një rritje 5-6 % në muaj. Me këto ritme ne mund të shkojmë në mbi 70 % në muaj. Këtu nuk llogarisim vaksinat”, tha Sulçebe. Sipas tij, në rang vendi jemi shumë larg imunitetit të tufës, pasi jemi në 20-25 %.
“Ka të bëjë dendësia e popullsisë. Në Tiranë ka një dendësi të madhe dhe ka një përhapje të madhe të virusit”, tha ai.
