Teksa Gjykata Kushtetuese po përpëlitet pa dinjitet për të zvarritur çështjen Balluku, duket se presioni ndërkombëtar mbi Edi Ramën po rritet në progresion asfiksues. Të hënën, kryeministri i Shqipërisë do të udhëtojë drejt Brukselit për t’u takuar me presidentin e Këshillit të Europës, Antonio Costa.
Takimi i beftë dhe i palajmëruar vjen në kontekstin e zhvillimeve të fundit në Shqipëri, veçanërisht ngërçit institucional të krijuar pas hetimit të SPAK ndaj Belinda Ballukut dhe refuzimit të mazhorancës për të dhënë autorizimin për arrestimin e saj.
Tashmë po bëhet gjithmonë e më e qartë se Brukseli ka perceptuar një kthesë në qëndrimin e Edi Ramës dhe maxhorancës socialiste në raport me drejtësinë e re. Teksa për vite me radhë kryeministri u është shitur ndërkombëtarëve si udhëheqësi i vetëm politik në Shqipëri që respekton pavarësinë e drejtësisë, çështja Balluku, por edhe ajo e AKSHI-t duket se e grisën perden e propagandës duke e detyruar Edi Ramën që tashmë të qëndrojë përballë drejtësisë për ta penguar atë.
Një burim në Bruksel i tha Kapitalit se një nga temat e nxehta që do të preket të hënën në Bruksel është pikërisht çështja e imunitetit të Belinda Ballukut. Në këtë pikë, kërkesa e Brukselit është e qartë. Edi Rama duhet ose të dorëzojë imunitetin e zëvendëses së tij, ose të bëjë llogaritë me atë që do të ndodh më pas me qëndrimet e Brukselit.
Nuk dihet nëse diskutimet për këtë temë do të bëhen pjesë edhe e njoftimit zyrtar, që do të nxirret pas takimit mes Antonio Costas dhe Edi Ramës. Por ajo që dihet është se këto kohë në kancelaritë e Europës ka patur lëvizje të shumta.
Këtë javë Antonio Costa dhe Ursula Von Der Leyen ishin të dy në Paris, ku u takuan me presidentin francez Manuel Macron.
Në Bruksel ka një rrymë që e njeh mirë fuqinë e madhe lobuese të Edi Ramës, e cila druhet se kryeministri shqiptar mund të lobojë përmes miqësive personale me Macron apo ndonjë udhëheqësi tjetër europian për të zbutur gjuhën dhe qëndrimin e Brukselit ndaj Shqipërisë.
Nuk dihet nëse në takimin e dyshes Costa-VDL me presidentin Macron është cekur edhe tema e Shqipërisë. Por pas mbledhjes së COELA-s javën e kaluar, ujrat janë trazuar jo pak.
Megjithatë kjo është një patate e nxehtë për Brukselin. Përplasja e qeverisë me SPAK-un konsiderohet me të vërtetë një vije e kuqe nga Bashkimi Europian, deri në pikën që të ndalojë përfundimisht integrimin. Por nga ana tjetër, nxjerrja e Shqipërisë nga orbita e anëtarësimit në Bashkimin Europian do të hapte kutinë e pandorës në të gjithë Ballkanin Perëndimor duke rrezikuar të hedhë në kosh dhe të çojë në dështim strategjinë e zgjerimit, e cila ka qenë një nga kartat kryesore të politikës së Brukselit këto vitet e fundit.
Gjithsesi zhvillimet janë intensive. Vetë Edi Rama tashmë e ka të qartë se marrëdhëniet e tij me Brukselin dhe udhëheqësit e Europës nuk janë më aq të ngrohta dhe miqësore sa dikur, kur i impresiononte me batuta dhe barcaleta. Tani gjërat janë bërë serioze për kryeministrin, të cilit me pak fjalë po i thonë lësho Ballukun (dhe pas Ballukut dihet se kë) ose harroje 2030-ën e integrimit.
Megjithatë kushdo që e njeh karrierën politike të Edi Ramës, e di se kryeministri i Shqipërisë deri më tani është rrëzuar gjithmonë në këmbë duke çuar në perfeksion artin e të mijetuarit politik. Këtë herë sfida gjithsesi duket më e vështira që ai ka patur. Sepse vjen nga dy fronte. Jo vetëm nga Brukseli, por edhe nga matanë oqeanit. Dhe mesazhi është gjithmonë ai. Lësho Ballukun (dhe pas saj e di vet ti). /Kapitali.al/
