Sandër Lleshaj u shpreh sot se do të vijojë të qëndrojë në detyrën e ministrit të Brendshëm, edhe pse në media është paralajmëruar një largim i mundshëm i tij.
ndërsa ka folur për ndryshimet në Kodin Rrugor, Lleshaj u pyet nëse ka informacione se grupe kriminale mund të ndërhyjnë në zgjedhje, ndërsa premtoi se në 25 prill do të zhvillohet procesi më i mirë zgjedhor që Shqipëria ka pasur ndonjëherë.
Kur u pyet me apo pa ju, Lleshaj tha “me”, duke e shoqëruar përgjigjen me të qeshura.
Duket se ministri i Brendshëm, pasi humbi vendin e drejtuesit politik të Lezhës, për shkak të përplasjeve edhe me strukturat partiake dhe ato të pushtetit vendor, duket se ka marrë garanci nga Kryeministri që të vijojë të drejtojë Ministrinë e Brendshme.
Pyetjes së gazetarëve se nëse do të ketë një ligj që aksidentet e rënda të shpallen vrasje rrugore, Lleshaj tha se po punohet për ndryshime rrënjësore në kodin rrugor shqiptar, që synojnë penalizmin e rëndë të atyre që shkaktojnë aksidente dhe pasoja në trafik.
Pyetje: Keni ndonjë koment për deklaratën e PD lidhur me disa drejtues policie, që dyshohet se kanë qenë eksponentë të ish-sigurimit të shtetit?
Lleshaj: Nuk kam komente. Di që për drejtuesit e policisë kemi ngritur një sturkturë të pavarur që merret me vetingun e tyre dhe do ia lëmë asaj të shprehet emër për emër.
Pyetje: Mendoni se policia e shtetit është në dorën e sigurimit të shtetit siç deklaron PD?
Lleshaj: Policia s’është në dorën e ish-Sigurimit të Shtetit për këtë ju garantoj, s’mund të jetë.
Pyetje: Jeni i kënaqur me ecurinë që ka pasur vetingu në Policinë e Shtetit?
Është folur shpesh për pastrimin e radhëve të policisë nga të delegjitimuarit dhe nga persona që mund të kenë pasur probleme me grupe kriminale në Shqipëri. Si e argumentoni ecurinë e vetingut?
Lleshaj: Policia është një nga strukturat më të mbështetura nga qytetarët shqiptarë. Sigurisht policia si çdo organizëm i përbërë nga njerëz ka problemet e saj dhe për këtë arsye është institucioni më i vëzhguar. Është e garantuar për publikun se mbijetesa e të inkriminuarve, korruptuarve apo të lidhurve me regjimin komunist në forma kriminale është e pamundur në polici.
Pyetje: 2020 e keni shpallur si vitin e sigurisë rrugore, por dje kishte një aksident të rëndë me dy viktima. Ka vend që pr ligji i ri të dalë nga pluhuri dhe këto aksidente të rënda të shpallen vrasje rrugore?
Lleshaj: Ne sapo kemi lançuar në rrugë zyrtare iniciativën për ndryshime rrënjësore në kodin rrugor shqiptar, që synojnë penalizmin e rëndë të atyre që shkaktojnë aksidente dhe pasoja në trafik. Dua t’ju them se me gjithë faktin se çdo aksident është i rëndë dhe i papranueshëm, tendenca e aksidenteve rrugore në Shqipëri është në ulje të vazhdueshme. Sivjet kemi më pak aksidenteve si vjet në këtë periudhë dhe kjo do të vazhdojë drejt sigurimit.
Pyetje: Zgjedhjet e 2021 kanë një afat. Keni sinjalizime që grupe të ndryshme kriminale që nga drejtësia janë lënë në terren, mund të veprojnë? Si do të monitorohet ky proces?
Lleshaj: Nuk kemi sinjalizime për aktivitet kriminal në këtë fushë, por kemi garanci të plotë se policia e shtetit edhe me masat që po marrim do të jetë absolutisht e aftë për të menaxhuar situatën e zgjedhjeve dhe Shqipëria do të ketë padiskutim zgjedhjet më të mira në historinë e saj.
Pyetje: Me apo pa ju?
Lleshaj: Me, me. (qesh)
