Të tjera detaje janë zbuluar nga tragjedia e Kombinatit, ku u gjetën pajetë në shtëpi nëna me të bijën dhe vajza tjetër në gjendje të rëndë shendetësore.
Sipas dosjes së prokurorisë, kufoma e Zhaneta Josifit u gjet në gjunjë afër divanit të sallonit, ndërsa në dhomën e gjumit, mbi një krevat dopio u gjet kufoma e Anisa Josifit, e dekompozuar dhe e mbuluar me copa të ndryshme dhe me jorgan.
Prokuroria ka regjistruar procedimin penal për ngjarjen horror në Kombinat për veprat penale “shkaktim i vetëvrasjes” dhe “Moskallëzim krimi”.
Akuza e moskallëzimit të krimit është referuar për Blertën, por prokuroria nuk ka regjistruar emër konkret për asnjërën prej tyre, pasi dyshimet janë se mund të ketë pasur persona të tjerë që i kanë shtyrë drejt këtij akti të rëndë.
Organi i akuzës po heton të gjithë personat qe mund të kenë dijeni për ngjarjen.
Sipas dosjes së Prokurorisë thuhet: ‘I është marrë deklarim shtetasit Selman Fejzo, në cilësinë e personit që ka dijeni për veprën penale. Ai sqaron se është vëllai i Zhaneta Josifit dhe prej disa kohësh motra e tij dhe vajzat kishin filluar të praktikonin besimin fetar.
Ai ka deklaruar se ka dy vite që nuk ka kontaktuar me vajzën e vogël dhe sa herë që pyeste motrën ajo i thoshte se nuk gjendej në shtëpi dhe nuk kishte pasur mundësi të kontaktonte me të.
Ai tregon se kunati tij Dhimos Paskali kishte ardhur para disa muajsh në polici dhe i kishte thënë që nuk po komunikonte dot me Anisën. Por kur policia i kishte shkuar në banesë shtetasja Zhaneta i kishte thënë se Anisa është në moshë madhore dhe nuk ka pasur mundësi të flas me njerëzit, por është mirë dhe ka disa probleme’.
Në dëshminë e të mbijetuarës së tragjedisë Blerta, dalin detaje mbi rrugëtimin e tyre, që i çoi më pas drejt fundit tragjik.
Blerta ka treguar se fillimisht kanë qenë pjesë e Dëshmitarëve të Jehovait, dhe janë shkëputur prej tyre 16 vite më parë, për t’iu bashkuar më pas Kishës Ungjillore në kryeqytet.
Sipas Blertës, para se qëndronte pa ngrënë, Anisa i ka shprehur asaj dhe nënës së tyre se po pushtohej nga kriza nervore dhe demonë të ndryshëm.
Më pas, pas 52 ditësh pa ngrënë, ajo ka ndërruar jetë në Mars të vitit të kaluar. Ndërsa ajo bashkë me nënën kanë nisur “agjërimin” nga ushqimi marsin e këtij viti, dhe ditën ku policia shkoi në shtëpinë e tyre kishin plot 45 ditë pa ngrënë.
LEXO EDHE:
