Nga Boldnews.al
Kryeministri Edi Rama ia ka arritur qëllimit të tërheqë vëmendjen me një nismë të propozuar për legalizimin e kanabisit për qëllime mjekësorë, sikundër ka deklaruar ai.
Në kulmin e izolimit ekstrem për shkak të “armikut të padukshëm”, Rama u shfaq dhe ripërsëriti idenë se Parlamenti do të miratojë ligjin, që e paska konsultuar me aktorë ndërkombëtarë. Nuk tha as kush janë aktorët dhe faktorët dhe as nuk paraqiti ndonjë detaj.
Zgjodhi pikërisht ditën e Europës, madje edhe orën kur në shesh policët e tij, tërhiqnin zvarrë një grup qytetarësh që as nuk arritën të organizoheshin.
BE pas disa orësh tha se nuk ishte konsultuar as me nismën as me draftin, por kjo nuk është ndonjë gjë që mund t´a bëjë Ramën të skuqet apo zverdhet.
Është i njëjti që kur u shfaq regjistrimi për vëllain e Fatmir Xhafajt, doli në një konferencë dhe dha rezultatet e laboratorit, të cilin Kryeministri e mbajti sekret, por që atij aq i duhej, sa të përhapte tymnajën, se për të ishte në gadishmëri një laborator që përcaktonte autencitetin.
Njëlloj edhe sot, ai flet për konsultime, por se kush janë ata dhe çfarë rolesh kanë asnjë nuk e di, përveç liderit.
Gjithsesi Rama arriti që me nismën e tij të tërheqë në valle vëmendjen e opinionit. Mbrëmjen e djeshme, 2 nga emisionet kishin në qendër pikërisht legalizimin e kanabisit, ndërsa dy të tjera, kishin zgjedhur të mbanin një stekë të ulët, duke i detyruar ata që i ndjekin, që të shkojnë pikërisht te debatet për kanabisin.
Fare mirë debatet mund të ishin për dhunën në sheshin Skënderbej, jo se policia dhunoi dhe tërhoqi zvarrë 10 apo 15 qytetarë, por sepse ajo është kthyer në një vegël të rrezikshme në duart e një Kryeministri që sheh ëndrra me arkivolë dhe ka merituar plotësisht titullin “panikaxhi”.
Si një mjeshtër i manipulimit, duke e njohur edhe mentalitetin e kësaj shoqërie, Rama jo rastësisht zgjodhi të hedhë në qarkullim një nismë dhe nuk është çudi që nesër të na thotë se është Zoti i shpëtimit të ekonomisë.
E ndërsa mijëra shqiptarë sot janë më të pasigurtë se viti 1991 kur u përmbys diktatura, që kanë humbur vende pune dhe se dinë si do të mund të përballojnë krizën e shkaktuar jo nga virusi, por nga paniku që kapi “gjeneralin”, Rama po përgatitet të shfaqet sërisht si shpëtimtar.
Këtë rradhë jo me paga lufte, as me paketa ndihme, as me ndonjë plan se si do të mund të rimëkëmbë bizneset e vogla, turizmin apo çdo sektor tjetër, por duke i hedhur si ushqim alternativën e kanabisit.
Dhe pas kësaj, lum ata që kanë ndonjë copë tokë, se mund të dalin dhe të ëndërrojnë për mrekullinë që po vjen.
Ndërsa u shfaq si Zoti që shpëtoi jetë nga koronavirusi i “tmerrshëm”, nesër ai do t´ju thotë se është Zoti që po ju nxjerr nga varfëria, dhe nuk është aspak çudi që videot me arkivolë, ti zëvendësojë me video me bidona apo fuçi me vaj kanabisi.
E ndërsa në rastin e parë i tmerroi njerëzit duke i mbyllur brenda njëlloj si delet në vathë, nesër mund t´i bëjë të ëndërrojnë duke numëruar paratë nga bumi që do vijë me legalizimin e kanabisit.
Atë që se arriti në rini si mjeshtër në basketboll, apo në pikturë, po e arrin tani si Kryeministër. E meriton titullin si mjeshtër i merituar “në përhapjen e panikut dhe shpëlarjes së trurit”.
