Zbardhen detaje nga plagosja e dyfishtë në Tiranë, ku pranë shkollës “Nikel Dardani” ka pasur të shtëna me armë.
Drejtori i Policisë së Tiranës, Rebani Jaupi, u shpreh se një efektiv i repartit Shqiponja ka qëlluar me armë ndaj një qytetari të armatosur dhe fatkeqësisht është plagosur edhe një kalimtare e rastit.
“Një punonjës policie, i repartit Shqiponja, i ka kërkuar një qytetari, dokumentet e identifikimit, dhe e ka pyetur se çfarë kishte në një çantë që kishte me vete.
Qytetari, që dyshohet se është person me rrezikshmëri të lartë, është larguar me vrap. Efektivi e ka ndjekur nga pas dhe është përballur sërisht me qytetarin, i cili i ka drejtuar një armë. Polici e ka paralajmëruar dhe ka qëlluar në ajër, por qytetari është larguar sërisht me vrap.
Polici e ka ndjekur nga pas dhe në momentin kur është përballur, ka qëlluar me armë duke plagosur qytetarin në pjesën e këmbës, pasi qytetari i ka drejtuar një armë.
Fatkeqësisht në atë kohë në zonë ka kaluar një kalimtare, e cila edhe ajo ka mbetur e plagosur në këmbë”, tha Jaupaj.
Sipas tij, edhe kalimtarja është plagosur nga të shtënat e punonjësit të policisë, i cili është me shumë eksperiencë dhe ka respektuar procedurat.
Kreu i Policisë së Tiranës tha se të plagosurit janë transportuar drejt spitalit të Traumës, ndërsa punonjësi i policisë po pyetet në Drejtorinë e Policisë së kryeqytetit lidhur me ngjarjen.
Ndërkohë që nuk dihet identiteti i qytetarit, që Jaupaj tha se ishte një person me rrezikshmëri të lartë.
“Ende nuk e dimë identitetin e tij, do i marrin gjurmët e gishtave, dhe më pas do kryejmë verifikimet, por dyshojmë se është person i shpallur në kërkim me rrezikshmëri të lartë”, tha Jaupaj.
DENONCO