Ka halle e halle! Por kjo që ka zënë anëtarin e Këshillit të Lartë të Prokurorisë, urojmë të mos zërë njeri. Tartar Bazaj nuk po gjen kartolinat që dashamirës të tij i kanë dërguar në institucion, për t’i uruar Vitin e Ri 2020.
I shqetësuar se asnjë kartolinë nuk i ka mbërritur në zyrë, Tartar Bazaj i kërkon informacion zyrtar kryetarit të Këshillit të Lartë të Prokurorisë, Gent Ibrahimi, për sqarime të detajuara.
Në një shkresë zyrtare, që mban datën 24 janar 2020, të siguruar nga “Boldnews.al”, anëtari Bazaj shpreh habinë se përse nuk i ka ardhur asnjë kartolinë.
“Çuditërisht, ende nuk më është vënë në dispozicion asnjë kartolinë”, i ankohet Bazaj, kryetarit të Këshillit të Lartë të Prokurorisë, Gent Ibrahimit.
Bazaj duket se aludon për një veprim me paramendim, kur deklaron se “nuk do ta besoja kurrë që ndonjë person të bjerë në nivel kaq të ulët sa të më mbajë kartolinat e urimit”.
Duke e shprehur keqardhjen që ai nuk ka marrë kartolinë urimi për 2020, si anëtarët e tjerë të Këshillit të Lartë të Prokurorisë, Tartar Bazaj ka zgjedhur të ndjekë rastin në rrugë ligjore.
Ai ka vënë në zbatim njohuritë e tij juridike. Bazaj i është drejtuar kryetarit të KLP-së, me një kërkesë zyrtare, bazuar në ligjin “Për informimin publik”, megjithëse çështja e kartolinave nuk është as akt zyrtar dhe aq më tepër, interes publik.
Megjithatë, Tartar Bazaj duket i vendosur të marrë përgjigje për dy pyetje thelbësore, që e kanë shqetësuar në këto ditë të para të vitit 2020:
- “Në adresën time në KLP, ka mbërritur ndonjë kartolinë urimi për vitin 2020?
- Nëse po, kanë mbetur rastësisht pa u bdarë apo cilat janë arsyet e mosdorëzimit të tyre tek personi im?”
Kjo çështja e kartolinave duket se e vendos Tartar Bazajn përballë një dileme të fortë: ose dikush brenda KLP i ka bllokuar qëllimisht kartolinat, ose askush nuk është kujtuar që ta urojë…
