Gjykata Kushtetuese ka dalë me një komunikatë për mediat, në lidhje me disa dokumente të publikuara në media, ku pretendohet se gjyqtari Gent Ibrahimi ishte vënë në përgjim nga SPAK, para se të zbardhej vendimi i arsyetur për padinë e Pëllumb Gjokës për pavlefshmërinë e bisedave në “Sky Ecc”.
Gjykata Kushtetuese thekson se nuk dëshiron të bëhet pjesë e këtij debati, teksa e mohon të ketë pasur ndikim apo presion të jashtëm në vendimarrjen e gjyqtarëve.
Një ditë më parë, Boldnews.al publikoi edhe përgjigjen që kreu i SPAK, Altin Dumani i ka dërguar kryetares së Kushtetueses, Holta Zaçajt, ku theksonte se asnjë prej anëtarëve të kësaj gjykate nuk është nën hetin dhe se për asnjërin prej tyre nuk ka patur kallëzim penal.
Reagimi i plotë i Gjykatës Kushtetuese:
Gjykata Kushtetuese, nisur nga debati mediatik i ditëve të fundit, për vënien nën përgjim nga Prokuroria e Posaçme të një gjyqtari kushtetues, që lidhet me ushtrimin e veprimtarisë së tij, konsideron me rëndësi që të sqarojë opinionin publik se në ushtrimin e misionit kushtetues për garantimin e epërsisë së Kushtetutës, ajo udhëhiqet nga parimet e kolegjialitetit, pavarësisë dhe paanësisë, të sanksionuara në ligjin themelor.
Gjykata është e vetëdijshme për ndikimin që ka veprimtaria dhe forca e autoritetit të saj ndaj aktorëve politikë dhe institucionalë, ndaj medias, palëve në proces, ashtu edhe ndaj opinionit publik. Për këto arsye, Gjykata ndjek rregullat e transparencës në vendimmarrje, me qëllim krijimin dhe ruajtjen e besimit publik ndaj saj.
Gjykata ka shprehur edhe më parë bindjen se ushtrimi i veprimtarisë në një klimë besimi nga kushdo i shërben forcimit të autoritetit të saj si organ kushtetues i pavarur, ndaj ka ngritur shqetësimin rreth keqinterpretimeve dhe përpjekjeve për ta përfshirë atë në debate të veshura nën petkun e diskurseve juridike për të paragjykuar vendimmarrje konkrete dhe për të ndërhyrë në pavarësinë e saj.
Pa dashur të bëhet pjesë e asnjë diskursi mediatik, Gjykata vlerëson të theksojë se procesi vendimmarrës në ushtrimin e funksionit për dhënien e drejtësisë kushtetuese bazohet në parimet dhe procedurat e parashikuara nga korniza kushtetuese dhe ligjore, duke qenë çdo vendimmarrje rezultat i një procesi diskutimesh të mendimeve dhe qëndrimeve të secilit gjyqtar kushtetues, sipas bindjes së tij të brendshme, për të cilat gëzon imunitet të garantuar nga Kushtetuta në ushtrim të funksionit të tij.
Gjykata, duke pranuar rëndësinë që ka në një shtet të së drejtës ushtrimi i kompetencave të çdo organi publik në respektim të kornizës kushtetuese dhe asaj ligjore, dëshiron të theksojë se ajo, sikundër ka vepruar deri më tani, do të vijojë të ushtrojë kompetencat e saj me korrektësi, integritet dhe e pavarur ndaj çdo ndikimi apo presioni të jashtëm.
Ekskluzive/ Dumani i përgjigjet Holta Zaçajt: Nuk kemi në hetim asnjë gjyqtar kushtetues
