Deputeti Lefter Maliqi ka shpërthyer në akuza ndaj Kryeministrit Edi Rama gjatë seancës së sotme parlamentare.
Ai e cilësoi Ramën si kreun e KÇK, ndërsa ka apeluar që atij të mos i besohet as në ato që thotë dhe as në ato që premton.
“Mashtron me aktrimin e tij për ndërtimet pa leje, për konçensionet, ku vet miqtë e tij i kanë dhënë lejet e ndërtimit oligarkëve në bashkitë Durrës, Krujë, ku humbën jetën 51 shqiptarë nga tërmeti i 26 nëntorit dhe po kështu dhe lejet e ndërtimit ku Tirana është betonizuar. Po kështu koncesionet me vendim parlamenti ua jep 10 herë më shumë se sa është projekti real i ndërtimeve oligarkëve pranë tij e plot abuzime të tjera duke e lënë vendin të pasigurtë, të varfër dhe të kriminalizuar, ku kemi largime masive dhe cpopullim”, tha Maliqi.
Në vijim deputeti e krahasoi Ramën me Al Kaponen, ndërsa theksoi se edhe tërheqja nga miratimit i paketës anti-shpifje është maskim i tyre pasi ata duhet ta rrëzojnë urgjent këtë projektligj, pasi është dështim dhe cënon rëndë pavarësinë e medias.
Duke u ndalur në situatën e krimit dhe pasigurisë në vend, Maliqi u shpreh se nga droga po ndodhin vrasjet, rrëmbimet, pastrimi i parave në ndërtime. Maliqi tha se për shkak të lidhjeve të krimit me qeverinë sot Shqipëria është një vend i pasigurtë dhe kemi një cpopullim për shkak të varfërisë, krimit dhe pasigurisë.
“Në burgje ka plot fukarenj e hallexhinj, të cilët thonë jemi më mirë në burg se ushqehemi pasi jemi të varfer e pa punë dhe s’kemi as bukë në shtëpi, vetem se kemi mall për familjaret. Në burgje ke fukarenj për energji elektrike, për 10 gr drogë, për mungesë patente etj, kurse bosët e krimit janë të lirë.
Ndërkohë ata që janë kapur me tonelata kane fituar gjyqet me kusht dhe shërbim prove ose janë të lirë pastrojnë parat e krimit me mbështetje të qeverisë.
Amnistia duhet të ishte më e gjerë pasi ka të burgosur për akuza qesharake dhe ligji duhet të futej në fuqi nga dita e sotme jo nga data që ju thoni 30.09.2019”, tha Maliqi.
Në vijim ai theksoi se pushtetin, Rilindja po e përdor kundër të varfërve dhe opozitarëve, ndërsa lihen të lirë kriminelët, ndërsa kandidohen për kryebashkiakë e deputetë, persona me rekorde kriminale.
Maliqi tha se edhe për tërmetin e 26 nëntorit u arrestuan ish-kryekomunarë të PD-së, ku nuk pati viktima, ndërsa kryebashkiakët në Durrës e Krujë, janë të lirë.
