Një grup të rinj dhe të rejash, aktivistë të njohur të shoqërisë civile, kanë zgjedhur një mënyrë krejt të veçantë për të ndihmuar familjet dhe qytetarët e prekur nga tërmeti në Bubq.
Një zonë, ku varfëria është ekstreme, dhe problemeve të shumta i shtohen edhe dëmet nga tërmeti, ka bërë bashkë emra të njohur e panjohur, që kanë ngritur një kuzhinë ku gatuajnë ushqimet e ngrohta për banorët e zonës.
Kërkesa e vetme që kanë ndaj qeverisë është t’i lenë të qetë të japin kontributin e tyre në ndihmë të banorëve, të mos i bllokohen ndihmat, kryesisht ato që vijnë nga Kosova, që herë kthehen në kufi, dhe herë përfundojnë te rezervat e shtetit.
Mënyra e zgjedhur për të ndihmuar banorët e Bubqit është larg pamjeve që serviren për të prekurit nga Durrësi apo zona të tjera.
Në Bubq nuk ka vëmendje qeveritare, madje vështirë se dikush mund të ketë vajtur për të parë gjendjen.
Gjithsesi të rinj dhe të reja, mes të cilëve edhe aktivisti Aulon Kalaja, duket se do të çojnë misionin e tyre deri në fund.
“Mirënjohje e thellë per të rinjtë dhe të rejat që prej ditësh po ndihmojnë banorët e Bubqit. Ata kanë ngritur një kuzhinë dhe gatuajnë drekë dhe darkë për banorët e dëmtuar nga tërmeti dhe një sistem shpërndarje bashkë me veshje dhe ilace për familjet në këtë zonë.
Mirënjohje nga zemra për të gjithë ata që kontribojnë sipas mundësive që së bashku si një familje e madhe duke ndihmuar njëri-tjetrin të lehtësojmë vuajtjet dhe dhimbjen e njerëzve në emergjencë”, shkruan Lulzim Basha në një postim në rrjet lidhur me atë se çfarë këto të rinj dhe të reja, pa ndonjë eksperiencë të mëparshme në raste fatkeqësish të tilla, po funksionojnë shumë më mirë se një qeveri e tërë.
