Kemi zgjedhur rrugën për t’i dhënë vendit një demokraci të vërtetë, jo fallso. Kemi zgjedhur rrugën për t’i dhënë qytetarëve një qeveri të vërtetë, jo që i shërben oligarkëve dhe godet qytetarët, që mbron politikanin e kapur me duar në thes duke vjedhur pronat tuaja, votat tuaja, pasuritë tuaja.
Kështu u shpreh kreu demokrat Lulzim Basha në takimin me qytetarë të Farkës, duke shtuar se me Edi Ramën nuk mund të ketë hapje negociatash.
“Nuk mund të ketë hapje negociatash kur kemi politikanë që marrin të gjitha pushtetet dhe i trajtojnë njerëzit si bagëti, që vendosin standard më keq se në vendet afrikane”, tha Basha, që e cilësoi kryeministrin si politikanin më të korruptuar dhe më të inkriminuar.
Kreu demokrat tha se vendi ka ecur mbrapa në të gjitha fushat nën qeverisjen e Edi Ramës.
“Ka 6 vjet kryeministër dhe nuk ka sjellë asnjë investim të huaj, përkundrazi i përzuri.
Kreditimi i bankave është katastrofë, pasi me qeverisjen e Ramës ekonomia u kriminalizua.
Se ata që janë të lidhur me policinë, sjellin një kontenier me banana, shesin atë që fshihet poshtë bananeve dhe siguron para sa 3 herë më shumë se buxheti i Policisë së Shtetit”, tha Basha.
Sipas tij, Shqipërisë nuk i hapen negociatat pasi as në fushën e ekonomisë, demokracisë dhe drejtësisë nuk ka hapa përpara, por ka hapa pas.
“Rruga që na çon në Europë, është rruga që ka zgjedhur PD. Hapi i parë është rikthimi i legjitimitetit politik në vend, rikthimi i një parlamenti që bën lidhe që të mbrojnë qytetarët, dhe jo të bëjnë ligje për oligarkët”, tha Basha.
Sipas tij, Rama ka kapur televizionet kombëtare, që i ka kthyer në buri makinash “ZIS” për propogandën qeveritare.
“E vetmja rrugë për t’i hapur dritën jeshile dialogut politik është largimi i Edi Ramës nga posti i kryeministrit, ndërsa një qeveri tranzitore do të kujdeset për të garantuar zgjedhjet”, tha Basha.
Sipas tij, në asnjë vend të Botës, përveç qeverisjes së Ramës, paratë nuk i merren shumicës dhe t’i jepen dy tre oligarkëve.
“Nuk ndodh në asnjë vend të Botës, përveç atyre të dështuara të Afrikës, që qeveria të ketë një politikë përbuzëse ndaj qytetarëve”, theksoi Basha.
Në vijim ai shtoi se vetëm PD mund të hapë derën e Shqipërisë në Europë, sikundër e bëmë me anëtarësimin në NATO.
“Luftuam krimin e organizuar, duke sjellë investimet e huaja në vend, madje si rezultat i luftës ndaj krimit, i hoqëm vizat shqiptarëve”, tha Basha.
